
Serê sibê tên û êvarê dest vala vedigerin 

2018-04-11 09:26:25


	WAN – Qirîza aborî esnafên bazarên taxan jî aniye asta îflasê. Welatî ji ber bihayên zêde bi gazin in. Welatî diyar kirin ku beriya niha fêkî û sebzeyên bi qaseyan dikirîn, lê niha nikarin bi kîloyan jî bistînin û dest vala vedigerin malên xwe.&nbsp;

	Li Tirkiyeyê û bajarên herêmê roj bi roj qirîza aborî giran dibe û li bandorek neyînî li ser welatî û esnafan dike. Qirîza aborî esnafên bazarên taxan ên Wanê anî asta topavêtinê û welatî jî diyar dikin ku ew nikarin dakevin bazarê û tiştekî bikirin. Esnaf û welatiyan got ku tekane riya çareseriya aborî bidawîkirina şer e û pêkhatina aştiyê ye.&nbsp;

	&nbsp;

	'ÇARESERIYA QIRÎZÊ AŞTÎ YE’&nbsp;

	&nbsp;

	Bedel Pala ê 25 sal e li bazaran fêkî û sebzeyan difiroşe anî ziman ku roj bi roj zexîre, fêkî û sebze biha dibe û got: “Kes nikare tiştekî bikire. Hilberînên li ser dezgehên xwe em nikarin bifiroşin û hemû xera dibin. Mirov bê kar in û qirîz xwe li me dipêçe. Çareseriya vê meseleya aboriyê anîna aştiyek mayînde û aramiyê ye. Aştî pêk were dê aborî jî rast bibe.”&nbsp;

	&nbsp;

	‘DU SALÊN DAWÎ ÊŞA ABORIYÊ DIKIŞÎNIM’&nbsp;

	&nbsp;

	Mîrhan Atlak ê bazarvan jî da zanîn ku pîşeya bazarê ji bavê xwe wergirtiye û wiha got: “Ez ji zarokatiya xwe ve vî karî dikim. Di du salên dawî de êşa em ji ber aboriyê dikişînin, me tu demê nekişandiye.”&nbsp;

	&nbsp;

	‘EZ DESTVALA VEDIGERIM’&nbsp;

	&nbsp;

	Mehmet Akaryuz ê 70 salî ku ji bo dan û stendinê daket bazarê jî destnîşan kir ku rewşa wî aborî sifir e û wiha dewam kir: “Ji bazarê destvala vedigerim malê. Çunkî pere nîne. Her tişt pir bihaye û êdî em nikarin bi kîloyan jî bistînin. Îro ez ji bazarê destvala vedigerim malê.”&nbsp;

	&nbsp;

	‘10 KES NIKARIN LI KESEKÎ BINÊRIN’&nbsp;

	&nbsp;

	Hasan Yokuş ê ji sala 1986’an vir ve esnafiya bazarê jî dike diyar kir ku 40 sal e ew esnafiyê dike û du salên dawî salên herî dest teng bûn e. Yokuş bal kişand ser bobelata aboriyê û got: “Berê berîkê min tije pere bûn û min li 10 ferdan dinêrî. Lê niha 10 kes nikarin li kesekî jî binêrin. Roj heye em nikarin pereyê nan bibin malê. Em kar dixwazin, şer naxwazin.”&nbsp;

	&nbsp;

	‘ÊDÎ EM NIKARIN BI KÎLOYAN JÎ BISTÎNIN’&nbsp;

	&nbsp;

	Ayşe Yildiz jî anî ziman ku berê fêkî û sebzeyan bi kasayan dikirîn, lê niha nikarin bi kîloyan bistînin. Yildiz wiha got: “Rewşa me her ku diçe ber bi şerpeziyê ve diçe. 10 ferdê malbatê hene, lê ji her sebzeyê tenê dikarin kîloyekê bikirim. Îdareya me nabe.”&nbsp;

	&nbsp;

	‘SIBÊ EM TÊN Û ÊVARÊ VALA VEDIGERIN’&nbsp;

	&nbsp;

	Murat Yilmaz ê esnafiyê dike jî destnîşan kir ku ew di rewşek nebaş a aborî de derbas dibin û got: “Kar tune ye û hêza me ya kirînê jî nemaye. Em wek berê nikarin tiştekî bikirin. Çunkî di berîka gel de pere nemane. Serê sibê em tên û êvarê jî dest vala vedigerin. Her kes emanetî xwedê ye.”&nbsp;

	&nbsp;

	MA / Mahmut Ruvanas&nbsp;