Standina kulîlkan jî sûc hatiye hesibandin! 2020-11-25 09:11:58   RIHA – Îdianameya derbarê 18 jê girtî 29 siyasetmedaran de hat qebûlkirin. Di îdianameyê serdana siyasetmedaran a ji bo malbatan û di serdanê de stendina kulîlkan û her wiha lidarxistina tûrnûvaya futbolê jî sûc hatiye hesibandin.    Serdozgeriya Komarê ya Dîlokê di 14'ê Mijdarê de di çarçoveya "Maseya Tirkiyeyê ya Komeleya Civaka Kurdistan" de hevşaredarên HDP'Ê yên bajêr, serokê SYKP'ê yê bajêr, rêveberên DBP'a bajêr, endamên ÎHD'ê, Komeleya 78'an, Dayikên Aştiyê û endamên meclîsa şaredariyê jî di nav de 29 siyasetmedar binçav kiribûn. Ji van siyasetmedaran 18 jê bi îdiaya "endamtiya rêxistinê" û "propagandaya rêxistinê" hatibûn girtin.     Îdianameya derbarê siyasetmedaran de hat amadekirin. Dadgeha Cezayê Giran a 2'yan a Dîlokê jî îdianame qebûl kir. Danişîna ewil dê di 4'ê Çileya 2021'ê de bê lidarxistin.    Di îdianameyê de Kongreya Civaka Demokratîk (KCD), Kongreya Demokratîk a Gelan (HDK), Meclîsa Ciwanan a HDP'ê, Meclîsa Jinan a HDP'ê, Tevgera Jinên Azad (TJA) û gelek sazî û komele wekî girêdayî KCK'ê bin hatine nîşandan.    Di îdianameyê de beşdarbûyîna merasîma cenazeyê Ayten Beçetê ku di 22'yê Adara 2019'an de li Girtîgeha Gebzeyê ya Jinan li dijî tecrîda li ser Rêberê PKK'ê Abdullah Ocalan dawî li jiyana xwe anîbû, seredana malbatê û çûyîna ser gora wê sûc hatiye hesibandin. Tevlîbûna civînên li avahiya partiyê jî sûc hatine hesibandin.    Her wiha ji ber ku endamê meclîsa şaredariyê Hurşît Besle ji bo serdana malbatan kulîlk stendine, ev kulîlk jî sûc hatine hesibandin.    Ji xeynî vê tûrnûvaya futbolê ya Meclîsa Ciwanên HDP'ê jî wekî delîla endamtiya rêxistinê hatiye hesibandin.    Hevdîtina Dayika Aştiyê Remziya Erden ku bi kurê xwe yê di Girtîgeha Rihayê de jî sûc hatiye hesibandin.    KESÊN GIRTΠ   Di vê dozê de 18 kes girtî ne. Navê kesên girtî ev in: Dayika Aştiyê Remzîye Erden, Hevserokên HDP'ê yên başêr Mûsa Aydin û Songul Koçdag, rêvebirê bajêr Abdûllah Acar, Hevserokê HDP'a Şahînbeyê Bahrî Yariş, rêvebira navçeyê Remziye Kûş, Hevserokê HDP'a Şehîtkamîlê Îbrahîm Dag, Hevserokê DBP'a Bajêr ê berê Alî Şîmşek, rêvebirên DBP'a bajêr Hasan Saran û Sevînç Selçûk, Hevserokê SYKP'ê yê Bajêr Mehmet Avşar, endamê meclîsê Hûrşît Besle, Endamê Komeleya Hiqûqnasên Azadîxwaz Adnan Erol, endamên Meclîsa Ciwanan a HDP'ê Enver Ozmen û Omer Sûngûr, rêvebirê DBP û HDP'ê ê bajêr ê berê Recaî Yilmaz, xwendekarên zanîngehê Cuneyt Kaya û Îsa Aslan.      Navê kesên bi awayekî negirtî jî tên darizandin ev in: Rêvebirê HDP'a Nîzîbê Abdulmutalîp Kiliç, Endama Komeleya 78'an Atiye Okay, rêvebira DBP'a bajêr Ayfer Dogan, Bîrgul Yildirim, rêvebira DBP'a bajêr a berê Habîbe Ocal Tîşkaya, Mehmet Kiliç, Keyayê Taxa Aydinlar a navçeya Şehîtkamîlê Salîh Bîrîşîk, keyayê berê Mûstafa Can, Munever Avşar, rêvebirê DBP'a bajêr Rifat Necîp Ataş, Hevserokê Navçeya Îslahiyeyê Yûsûf Îyem.