
Parêzerên Z.N. giliya astengiya hevdîtina pê re kirin

2021-01-06 11:54:03


	&nbsp;

	WAN &nbsp;- Parêzerên penabera îranî Z.N. ku li GGM’a Wanê tecawizî wê hatibû kirin, giliya rayedarên ŞONÎM’ê ku hevdîtina bi muwekîla wan re asteng kiribûn, kirin.&nbsp;

	&nbsp;

	Peywirdarên ewlehiyê yên Navenda Paşvegerandinê ya li navçeya Artemêtanê ya Wanê (GGM) &nbsp;Î.H.K. , Y.V. û kesekî ku navê wî hê nehatiye zelalkirin, di 26’ê tîrmeha 2020’an de li navendê dest dirêjî penabera îranî Z.N. kiribûn. Piştre derbarê vê destdirêjiyê de doz hatibû vekirin û danişîna yekemîn a vê dozê di 22’ê mijdara 2020’an de li 1’emîn Dadgeha Cezaya Giran a Wanê hatibû dîtin. Di danişînê de derketibû holê ku Z.N. 4 mehan li GGM’ê hatiye girtin û şandine Navenda Şopandin û Pêşîlêgirtina Tundiyê (ŞONÎM) ya li bajar.

	&nbsp;

	Parêzerên Z.N. Ebrû Demîrtepe û Mahmût Kaçan, piştî danişînê xwestibûn bi muwekîla xwe Z.N. a li ŞONIM’ê re hevdîtin bikin, lê rayedarên ŞONÎM’ê destûr nedabûn vê hevdîtinê. Li ser vê yekê parêzeran serî li Serdozgeriya Komarê ya Wanê dan û giliya alîkarê midurê ŞONÎM’ê û karmendê qeyda ewraqan kirin.&nbsp;

	&nbsp;

	Hat hînbûn ku piştî giliyê lêpirsîn hatiye destpêkirin û di çarçoveya lêpirsînê de gotinên rayedarên ku giliya wan hatiye kirin dê bên girtin.&nbsp;

	&nbsp;

	&nbsp;

	&nbsp;