
TÛHAY-DER: Bila daxwazên girtiyan bên qebûlkirin 

2021-03-11 09:00:54


	WAN - Hevseroka TÛHAY-DER a Şaxa Wanê Kûdret Temel, diyar kir ku daxwazên girtiyên di greva birçîbûnê de, daxwazên rewa ne û bang li rayedaran kir ku gavina biavêjin.&nbsp;

	Çalakiyên greva birçîbûnê yên girtiyan ku li dijî tecrîda li ser Rêberê PKK'ê Abdullah Ocalan hatine destpêkirin, di roja 105'an de ne. Hevseroka Komeleya Alîkariyê ya Ji Bo Malbatên Girtî û Hikumxwaran (TÛHAY-DER) a Şaxa Wanê Kûdret Temel, bang kir ku daxwazên girtiyan bên qebûlkirin.&nbsp;

	&nbsp;

	DAXWAZINE REWA&nbsp;

	&nbsp;

	Temel, anî ziman ku bidawîbûna tecrîdê, dayîna ava germ, derketina hewadariyê û çûna nexweşxaneyê daxwazine rewa ne. Temel got: "Em jî dixwazin tecrîd bê rakirin. Divê mafên ku bi qanûnan hatine diyarkirin pêk bên."

	&nbsp;

	Temel, bilêv kir ku naxwazin wekî berê kes jiyana xwe ji dest bidin û got: "Wezareta Dadê û parlementer divê bêdeng nemînin. Rojek berî rojekê divê daxwazên girtiyan bên qebûlkirin."&nbsp;

	&nbsp;

	DAXWAZA MALBATAN&nbsp;

	&nbsp;

	Temel, destnîşan kir ku daxwaza malbatên girtiyan jî heman daxwaz e û got: "Malbat dixwazin her kes xwedî li daxwazên girtiyan derkeve û binpêkirinên mafan bi dawî bibin. Her wiha dixwazin girtiyên nexweş ên 75-80 salî bên berdan. Dibêjin, 'Heger gavek neyê avêtin dê biçin ber girtîgehan."&nbsp;

	&nbsp;

	Temel, diyar kir ku heya daxwaz neyên qebûlkirin dê çalakî jî bi dawî nebin û got: "Berî ku girtî çalakiya xwe veguherînin a bêdem û bêdorveger divê tecrîd bê rakirin. Bila cenaze dernekevin ji girtîgehan. Bila her kes dengê xwe bilind bike, bêdeng nemîne û xwedî li girtiyan derkeve."&nbsp;