Ji 10 kolberên dibin çavan de agahî nayê girtin

2021-03-28 11:25:11


	WAN - Hat diyarkirin ku 10 kolberên li ser sînorê Îran û Tirkiyeyê asê mabûn, ji aliyê eskeran ve hatine binçavkirin. Xizmên kolberan, diyar kirin ku bi rojane agahî ji kolberan nagirin û derbarê jiyana wan de, bi fikarin.  

	 

	Hat destnîşankirin ku li ser sînorê dikeve di navbera gundê Koran a girêdayî Bajarê Ûrmiyê yê Îranê û goma Derav a girêdayî gundê Xaşkan a navçeya Elbakê ya Wanê, 10 kolberên asê mabûn hatine binçavkirin. Hat diyarkirin ku kolberên di 25’ê Adarê de, li ser sînorê Tirkiyeyê ji aliyê eskeran ve hatibûn binçavkirin, bi helîkopteran ji herêmê hatin derxistin. Xizmên kolberan ên agahî li xizmên xwe nagirin, derbarê jiyana wan de bi fikarin. 

	 

	'EM TU AGAHIYÊ NAGIRIN’

	 

	Sadeş Pelîfken ê ji ajansa me re axivî û got, xizmê kolberên dibin çavan de ye, wiha qala bûyerê kir: “Ev 4 rojin em bi tu awayî agahiyê ji xizmên xwe nagirin. Zixmên me ji aliyê eskerên tirk ve hatin binçavkirin. Piştî ku kolber hatin binçavkirin, helîkopter hatin ew ji herêmê birin. Xizmên me di li ser  xeta sînor a di navbera Îran û Tirkiyeyê cixariyan dibin û tînin. Li her du aliyên sînor eskerên tirk û pasdarên Îranê hebûn. Hatibûn dorpêçkirin. 2 rojan li ser sînor di sir û seqemê de man. Ewil 12 kolber bûn. 2 ji wan reviyan û hatin gund. 10 kesên din ên li ser sînor asê mabûn jî, ji aliyê eskerên tirk ve hatin binçavkirin û dûre helîkopter hatin ew birin. Bi rojane em agahiyê ji xizmên xwe nagirin. Em dixwazin agahiyêkê bidin me.”

	 

	Navê kolberên hatin binçavkirin wiha ne: “Mihemed Ehmedî, Şemsedîn Heseni, Erdelan Xelîlî, Ferşad Ehmedî, Mahsun Ehmedî, Feyyaz Ehmedî, Arman Ehmedî, Yûsûf Kenanî, Cambexş Ehmedî û Behruz Ehmedî.”