Dayikên Aştiyê daxwaza azadiya Ocalan kirin 

2022-02-10 10:33:02


	 

	COLEMÊRG - Dayikên Aştiyê, diyar kirin ku divê Rêberê PKK'ê Abdullah Ocalan azad be û ev tişt gotin: "Bi kûrbûna tecrîdê re Pirsgirêka Kurd ji çareseriyê dûr dikeve."

	 

	Ji 25'ê adara 2021'an ve agahî ji Rêberê PKK'ê Abdullah Ocalan ku li Girtîgeha Tîpa F a Ewlehiya bilind a Îmraliyê tê girtin agahî nayê girtin. Ji ber ku agahî ji Ocalan nayê girtin fikarin civakê yên ji bo Ocalan zêde dibin. Dayikên Aştiyê yên Colemêrgê, diyar kirin ku divê tecrîda li ser Ocalan demildest rabe û ev bang li Wezîrê Edaletê kirin: "Berpirsyariya xwe bi cih bîne."

	 

	JI OCALAN RE AZADΠ

	 

	Dayika Aştiyê Belgîn Polat ku xwest tecrîda li ser Ocalan demildest rabe, diyar kir ku Wezîrê Edaletê peywira xwe bi cih nayne û wiha got: "Em ji birêz Ocalan û girtiyên nexweş re azadî dixwazin. Weke Dayikên Aştiyê em tecrîdê qebûl nakin. Nêzî 10 mehan e ji Ocalan agahî nayê girtin. Divê desthilat astengiyên li pêşiya hevdîtina bi Ocalan re rake. Madem Wezîrê Edaletê peywira xwe nake çima li wî meqamî rûdinê. Divê desthilata vê pisgirêkê pê re çareser bike. Heke tiştek bê serê Ocalan û girtiyên nexweş wê desthilat û Wezîrê Edaletê berpirsyar bin."

	 

	NAVNÎŞANA ÇARESERIYA DEMOKRATÎK

	 

	Dayika Aştiyê Emîne Atak jî destnîşan kir ku Ocalan 23 sal in li dijî tecrîdê têdikoşe û ev tişt anîn ziman: "Em dixwazin tecrîda li ser Ocalan rabe. Ocalan nûnertiya vîna 40 milyon kurdî dike. Êdî bes e bila ev zilm û biqûqî bi dawî bibe. Kêr gihîştiye hestî. Ev polîtîkayên dijminane li tu dera dinyayê tune ne. Dewlet bi tecrîdkirina Ocalan hewl dide hemû kurdan bitepisîne. Lê wê nikaribe bi serkeve; lewre gelê kurd li ber xwe dide. Beriya her tiştî em dixwazin ev şer bi aştiyeke rasteqîn çareser bibe. Çareseriya demokratîk a Pirsgirêka Kurd bi muxatabiya Ocalan pêkan e."

	 

	'BILA EV BÊHIQÛQÎ BI DAWÎ BIBE'

	 

	Dayika Aştiyê Nazdar Çelîk jî xwest ku malbat û parêzerên Ocalan pê re hevdîtin bikin û wiha axivî: "Em dixwazin êdî ev bêhiqûqî bi dawî bibe. Îro bi sedan xizmên girtiyên nexweş û girtiyên ku înfaza wan hatiye şewitandin û nayên berdan ji bo berdana wan di nobetê de ne. Daxwaza me ya destpêkê rakirina tecrîda li ser Ocalan e. Divê destûr bê dayîn ku malbat û parêzer bi Ocalan re hevdîtin bikin. Di heman demê de divê binpêkirinên mafan ên li girtîgehan bi dawî bibin."