Li dijî komployê meşeke girseyî: Silav hezar silav li Îmraliyê!   

2022-02-15 18:34:12


	STENBOL - Stenbolîyan bi meşeke girseyî û bi dirûşmeya "Silav, silav hezar silav li Îmralîyê" komploya 15'ê Sibatê ya li dijî Rêberê PKK'ê Abdullah Ocalan şermezar kirin. 

	
		
			Rêxistina Partiya Demokratîk a Gelan (HDP) a Stenbolê, ji bo şermezarkirina komploya navdewletî ya 15'ê Sibatê ya li dijî Rêberê PKK'ê Abdullah Ocalan li Qada Şirinevler a Stenbolê kom bû. Hevserokê, Kongra Civaka Demokratîk a (DTK) Berdan Ozturk, parlementerên HDP'ê Mûsa Piroğlu, Ruştu Tiryakî û nûnerên Partîya Herêmên Demokratîk (DBP), Tevgera Jinên Azad (TJA), Înîsiyatîfa Dayîkên Aşitiyê, Saziya Alîkarî û Piştgiriya Ji Bo Malbatên Girtîyan a Marmarayê (MATUHAYDER), Saziya Elewiyên Demokratîk (DAD) jî di nav de bi hezaran tev li çalakiyê bûn. 
		
			 
		
			BI MEŞEKE GIRSEYÎ KOMPLOYÊ ŞERMEZARKIRIN
		
			 
		
			Berî çalakî bê lidarxistin Qada Şirinevlerê ji alîyê bi sedan polîsan û wesayîtên zirxî ve hat dorpêçkirin. Girseyê xwest li qadê daxuyaniyê bide, lê piştî nehat hiştin girse ber bi Rêxistina HDP'a Bahçelievlerê meşiya. Di meşê da çalakger tim bi berzkirina dirûşmeyên wekî "Silav silav hezar silav li Îmrlaiyê", Bê Serok jiyan nabe", "Bijî Berxwedana zîndanan" û "Bijî Serok Apo" komployê şermezar kirin.
		
			 
		
			'HÛN Ê TÊK BIÇIN'
		
			 
		
			Piştî meşê Hevseroka HDP'ê ya Stenbolê Îlknûr Bîrol axivî. Bîrol, bal kişand qedexe û astengkirina çalakiyan û got: "Mafê me yê daxuyaniyê xesp kirin. Mafê fikir û ramanê binpê kirin. Ev, tiştekî faşîstî ye. Ji vê rewşê jî xuya dike ku bê Tirkiye çi qasî ji şert û mercên demokratîk dûr ketiye. Baş bizanin, hûn ê têk biçin."