Ciwanê li Çewligê polîsan lê da: Çima îşareta ulkucuyan nakî?

2022-04-11 17:17:39


	 

	ÇEWLIG - Mahfûz Taş ê li navçeya Bongilan a Çewligê ji ber îşareta serkeftinê kir polîsan lê dan, diyar kir ku yek ji polîsan jê re gotiye “Çima tu îşareta ulkucuyan nakî” û di bin çavan de gef lê hatiye xwarin. 

	 

	Ciwanê bi navê Mahfûz Taş (18) li navçeya Bongilan a Çewligê ji ber îşareta serkeftinê kir, polîsan lê dan. Polîsên ku 9’ê Nîsanê de digeriyan her sê hevalên hev ên ciwan ku li taxê wêne dikişandin, sekinandin. Polîsên ku gotin “Hûn li me dinêrin û vê îşaretê dikin” êrişî Taş kirin. Taş ê heta bêhna wî çikiya polîsan lê dan, bi darê zorê li wesayîtê siwar kirin û birin Miduriyeta Polîsan a Bongilanê. Taş ê şev li miduriyeta polîsan hat ragirtin, serê sibê hat berdan. 

	 

	Taş ê polîsan tundî lê kir û lê dan, tiştên jiyan vegot. Taş, diyar kir ku dema di 9’ê Nîsanê de bi 3 hevalên xwe ve li kolanê îşareta serkeftinê kirin û xwestin wêne bikişînin, wesayîta polîsan nêzîkî wan bûye û pirsa “Hûn li me dinêrin û vê îşaretê dikin?” ji wan kirine. Taş, da zanîn ku polîsan ji wan re îdia kirine ku îşareta serkeftinê sûc e û pirsên “Hûn çima îşareta ulkucuyan nakin?” û “Hûn serkeftina çi pîroz dikin?” ji wan pirsîne. Taş, bi lêv kir ku tevî tu pirsgirêk nebûn jî polîsan di GBT’ê re derbas kirine û ser wan geriyane.

	 

	‘POLÎS LI ÇAVÊ MIN Ê EMELIYATKIRÎ DA’

	 

	Taş, tiştên jiyan wiha vegot: “Polîs kete bin çenge min û got ‘tu bi kî ve diçî?’ Pişt re bi piştê ve kulmek li serê min da. Çeka xwe kir pişta min re û bi dehfdanê ez ketim erdî, çek jî kete erdî. Dema ez li erdî bûm, her çar polîsan bi hev re êrişî min kirin. Min ji wî polîsê çeka wî ket pirsa ‘çima we li min xist?’ kir. Wî jî got ‘min li te neda lê niha ez ê li te bidim’ û kulmek li çavê min da. Pişt re li wesayîtê siwar kirim. Polîsekî destên min kelemçe kirin. Min ji wan re got çavê min emeliyat kiriye wan jî got kîjan çav e. Piştî ku min got çavê çepê ye gelek caran bi kulman li çavê min dan.”

	 

	LI QEREQOLÊ JÎ LÊ DAN

	 

	Taş, diyar kir ku piştî polîsan lê xist ew birin Miduriyeta Polîsan a Bongilanê û şevekê di binçavan de ma. Taş, destnîşan kir ku tundiya polîsan li miduriyeta polîsan jî berdewam kiriye û wiha axivî: “Li vir jî ji min re gotin ‘heke tu biqîrî em ê zêdetir li te bidin’. Derî girtin û çûn. Li wir jî bi derbê kuştinê li min dan. Gelek caran li dilê min û zikê min xistin. Dema li min dan ez bê bêhn mam. Polîsekî li wir ji min re got ‘bimire bîjî’. Dema ez bê bêhn mam sekinîn.”

	 

	‘EM Ê SICILA TE XERA BIKIN’

	 

	Taş, anî ziman ku polîsan gef li wî xwarine ku giliyê wan neke û got: “Polîsan bi gotina ‘Heke tu têkildarî me baş neaxivî em derbarê te de dosyaya terorê vekin. Sicila te xera bikin. Tu nikarî bibî karmend’ gef li min xwarin. Polîsan bi gotina ‘tiştek bi me nayê’ xwestin çavên min bitirsînin.”

	 

	WÊ POLÎSAN GILÎ BIKE

	 

	Taş, da zanîn ku piştî hat berdan ji bo raporê bigire çûye Nexweşxaneya Dewletê ya Bongilanê û diyar kir ku bijîşk ew muayene kiriye lê rapora lêdanê nedaye wî. Taş, bi lêv kir ku parêzerê wî çûye miduriyeta polîsan û anî ziman ku wê giliyê polîsan bike

	 

	MA / Ceylan Şahînlî