Artêşa Tirkiyeyê li Biradostê 12 ciwan girtin û aqûbeta wan nayê zanîn 

2022-04-17 14:11:19


	 

	NAVENDA NÛÇEYAN - Leşkerên artêşa Tirkiyeyê sê roj berê 12 ciwanên ji herêma Biradostê girtibûn. Ji wê rojê ve agahî ji ciwanan nayê girtin. 

	 

	Di 15’ê nîsanê de dema Serokwezîrê Herêma Federal a Kurdistanê Mesrûr Barzanî bi Serokomarê AKP’î Tayyîp Erdogan re hevdîtin dikir, artêşa Tirkiyeyê li herêma Biradostê ya girêdayî Hewlêrê 12 ciwan girtin. Li gorî nûçeya Rojnewsê, leşkerên artêşa Tirkiyeyê gelek hespên xelkê herêmê kuştin û welatî îşkencekirin. 

	 

	Hat zanîn ku ciwanên hatine girtin ji gundên Dîla, Malmaluk û Mîdan ên ser bi bajarokê Sîdekan a navçeya Soran a Hewlêrê ne.

	 

	Têkildarî mijarê Waliyê Hewlêrê Umêd Xoşnav duh daxuyaniyek da û diyar kir ku Saziya Penwediyên Karên Derve bi aliyên peywendîdar ên Tirkiyeyê re ji bo mijarê di nava danûstandinan de ne. 

	 

	Hêjayî bibîrxistinê ye ku bi ser girtina welatiyan re 3 roj derbas dibin lê hêj jî tu agahî jê nayên girtin. Ji bilî daxuyaniya waliyê Hewlêrê, heta niha jî hikûmeta Başûr girêdayî mijarê tu helwestek nîşan nedaye.