
Di doza êrişa li dijî malbata Dedeogullari de polîs bi nakokî axivîn  

2022-04-20 14:42:18


	&nbsp;

	KONYA - Polîsên di doza Malbata Dedeogullari ku bi êrişa nijadperest re rûbirû mabû de wek şahid hatin guhdarîkirin, beyanên bi nakokî dan.&nbsp;

	&nbsp;

	Li navçeya Meramê ya Konyayê beriya ku 7 ferdên malbata Dedeogullari werin qetilkirin, di 12’ê gulana 2021’an de li dijî ferdên malbatê êrişek nijadperest pêk hatibû. Ferdên malbata Keleş û Çalik vê êrişa nijadperest kiribûn. Derbarê vê êrişa nijadperest de doz hatibû vekirin. Danişîna 3’yemîn a doza êrişa nijadperest li Dadgeha Cezayê Giran a Konyayê ya 8’emîn hat lidarxistin.&nbsp;

	&nbsp;

	Çetîn Dedeogullari yê ku ji malbatê tenê maye û xizmên xwe, rêveberên HDP’ê û gelek parêzer tevli danişînê bûn.&nbsp;

	&nbsp;

	HIN BERSÎC TEVLI DANIŞÎNÊ NEBÛN

	&nbsp;

	Alî Keleş û Lutfi Keleş ên di çarçoveya dosyeyê de girtî tên darizandin ji girtîgeha lê girtî ne bi rêya SEGBÎS’ê tevli danişînê bûn. Hin bersûc jî li eywana danişînê amade bûn û hin bersûc jî tevli danişînê nebûn.&nbsp;

	&nbsp;

	Danişînê bi tespîta nasnameyan dest pê kir û serokê dadgehê ewraqên li dosyeyê hatine zêdekirin xwend.&nbsp;

	&nbsp;

	GOTINE ‘EM Ê WE LI VIR NEHÊLIN’&nbsp;

	&nbsp;

	Xwişkên Yaşar Dedeogullari yê hat qetilkirin, Guneş Înîk û Ayfer Karasû diyar kirin ku ew di derheqê faîlan de gilîker in û xwestin tevli dozê bibin. Karasu anî ziman ku mala birayê wê her tim bi gefa malbata Keleş ku cîranên wan in re rûbirû diman û her tim ji malbavanê min re digotin, “Em ê we li vir nehêlin.”&nbsp;

	&nbsp;

	BEYANÊN POLÎSAN BI NAKOKÎ YE&nbsp;

	&nbsp;

	Polîs Mustafa Aras ê ku kêliya ewil çûye cihê bûyerê wek şahid hat guhdarîkirin û hat diyarkirin vî polîsî delîlan ji holê rakiriye.&nbsp;

	&nbsp;

	Parêzeran ji vî polîsî pirsan kirin û di bersivên xwe de balkêş bû ku beyan ango îfadeyên bi nakokî dide û saeta întîkala wan a cihê bûyerê û girtekên têkildarî bûyerê girtine, bi nakokî ne.&nbsp;

	&nbsp;

	Polîs Gunay Yuksel jî wek şahid hat guhdarîkirin û ev polîs jî axivî. Beyanên navbera her du polîsan bi eşkereyî nakokiyan raxistin ber çavan.&nbsp;

	&nbsp;

	Parêzeran li ser van beyanên bi nakokî gelek pirs ji polîsan kirin.&nbsp;

	&nbsp;

	‘EM MALÊ BIKIN MUZEYA ŞERMÊ’&nbsp;

	&nbsp;

	Ji parêzerên dozê Abdurrahman Karabulut anî ziman ku faîl ji aliyê dewletê ve tên parastin û got: “Heke edalet pêk neyê, em ê wê malê veguherînin muzeya şermê. Wê her gotina nijadperest a bersûcan li ser dîwaran wek şermê cih bigire. Ka em binêrin wê bêtir serdana Muzeya Mevlana an jî Muzeya Şermê were kirin.”&nbsp;

	&nbsp;

	‘LI HEMBERÎ ME KÎNDARÎ HEYE’&nbsp;

	&nbsp;

	Piştî beyanên parêzeran kekê Yaşar Dedeogullari, Cengîz Rifatoglu jî nivîsa “Edalet Bingeha Welat e (Adalet Mülkün Temelidir)” nîşan da û got: “Gelo li ser dîwar çi dinivîsine? Kemal Ataturk viya gotiye lê mixabin em vê nabînin. Li hemberî me kîn û nefretê dikin.” Rifatoglu bi van gotinan bertek nîşanî heyeta dadgehê da.&nbsp;

	&nbsp;

	Danişîn bi axaftina parêzerên bersûcan berdewam dike.&nbsp;

	&nbsp;