
Nîjadperestan li Denîzliyê êrişî malbateke kurd kirin 

2022-07-20 15:51:51


	&nbsp;

	DENÎZLÎ - Malbateke kurd a li Taxa Încîlîpinar a navçeya Pamukkaleyê dijiya, rastî êrişa nîjadperestan hat. Di dema êrişê de kesekî ev gef li malbatê xwar: “Çi karê kurdan li vê taxê heye? Ez ê we bikujim.”&nbsp;

	&nbsp;

	Malbateke kurd a li Taxa Încîlîpinar a navçeya Pamukkale ya Denîzliyê dijiya, rastî êrişa kesên nîjadperest hat. Li gorî agahiyan; kesê bi navê Hasan Akin serê sibehê saet di 07.30’an de hate ber deriyê malbateke kurd û êriş kir. Êrişkarê ku di destê wî de das hebû qêriya û got: “Çi karê kurdan li vê taxê heye? Ez ê we bikujim.” Êrişkarê ku çêr û heqaret li malbatê kir, piştre jî paceyên malbatê şikand.&nbsp;

	&nbsp;

	Li ser vê yekê endamên malbatê li polîsan geriyan. Hat zanîn ku di vê navberê de êrişkar Akin bangî du hevalên xwe yên din jî kir û di dest de das, hewl dan deriyê malê bişikînin û bikevin hundir.&nbsp;

	&nbsp;

	ENDAMÊN MALBATÊ HATIN DERBKIRIN

	&nbsp;

	Bi hatina polîsan re endamên malbatê bertek nîşanî êrişkar dan. Polîsan bi bombeyên xazê êrişî malbatê kir û 2 jin derb kirin. Polîsan 3 êrişkar û 3 endamên malbatê binçav kirin. Endamên malbatê di nezaretxaneyê de û êrişkar jî li baxçeyê emniyetê hatin sekinandin.&nbsp;

	&nbsp;

	ÊRIŞA NÎJADPEREST DERBASÎ GIRTEKAN NEKIRIN&nbsp;

	&nbsp;

	Demek piştre îfadeyên endamên malbatê hatin girtin. Malbatê da zanîn ku ji ber kurdbûna xwe rastî êrişa nîjadperest hatine û dîmenên vê êrişê jî di destê wan de hene. Di vê navberê de polîsan ji endamên malbatê re got; “kurdîniyê têkilî vê meseleyê nekin, çi eleqeya wê heye.” Polîsan, îfadeyên endamên malbatê ku digotin ji ber kurdbûna xwe rastî êrişa nîjadperest hatine derbasî girtekan nekirin.&nbsp;

	&nbsp;

	Piştî kar û barên îfadeyê jî hem endamên malbata rastî êrişê hatî û hem jî êrişkar hatin berdan.&nbsp;

	&nbsp;

	ŞÊNIYÊN TAXÊ NAXWAZIN

	&nbsp;

	Endamên malbatê ku par ji Manîsayê derbasî Denîzliyê bûne û nexwestin ji ber ewlehiyê navên xwe aşkera bikin, diyar kirin ku ji ber kurdbûna wan şêniyên taxê wan li wê derê naxwazin û her tim rastî zextan tên. Malbatê, da zanîn ku ew êrişkaran nas nakin û beriya niha jî rastî êrişeke wiha nehatine.&nbsp;

	&nbsp;

	DESTWERDAN NEKIRIN&nbsp;

	&nbsp;

	Di dîmenên ku malbatê kişandine de jî tê dîtin ku di destê êrişkar de das heye û çêran dike. Her wiha tê dîtin ku derî û paceyan dişikîne. Dema êrişkar çêr û êrişê dike jî gelek kes ji wê herêmê re derbas dibin lê kesek dengê xwe jê re nake.&nbsp;

	&nbsp;