Malbatên girtiyan: Bila girtiyên me nemirin

2022-08-30 12:53:55


	 

	AMED - Malbatên girtiyan çalakiya xwe li ber Girtîgeha Amedê berdewam kir û diyar kirin ku bila girtiyên wan nemirin û heqên wan were dayîn.

	 

	Nobeda Edaletê ya malbatên girtiyên nexweş û girtiyên berdana wan hatiye taloqkirin bên berdan di roja 287'de berdewam kir. Malbat li ber Girtîgeha Amedê ya Tîpa D’yê hatin gel hev û daxuyanî dan. 

	 

	Rêveberên Partiya Demokratîk a Gelan (HDP), Partiya Herêmên Demokratîk (DBP), Piştevaniya bi Malbatên Girtî û Hikumxwaran re (TUAY DER) ya Amedê, Komeleya Yekitî Çand Piştevanî û Alikariya bi Kesên Xizmên Xwe li Dergûşa Şaristaniyê Winda Kirine re (MEBYA-DER), Komeleya Lêkolînên Çand û Zimanên Mezopotamyayê (MED-DER), Komeleya 78’an jî ji bo piştevaniya malbatan tev li çalakiyê bûn.

	 

	‘WEZARETA DADÊ BI ÇAVEKÊ DIJMINATIYÊ LI ME DINÊRIN’

	 

	Di çalakiyê de xwîşka girtiyê nexweş ê 29 sale di girtîgehê de Abdulselam Guler, Încî Guler axivî. Guler bi lêv kir ku êdî bila girtî di girtîgehan de jiyana xwe ji dest nedin û îro dayîk bi gotina “bila zarokên me nemirin” diqîrin. Guler anî ziman ku Wezareta Dadê bi çavekî dijminatiyê li malbatan û girtiyan dinêre û wiha got: “Ya ku em dibêjin qirîna dayika ne, ew dayik jî dibêjin bila zarokên me bînin nêzî me. Êşa zarokan şewateke di dilê dayikan de ye. Bila bi çavekî dijminatiyê li zarokên me nenêrin, bila bi çavekî mirovahî li zarokên me binêrin. Qanunên xwe pêk bînin. Roj û saet mane ku girtî were berdan lê tên ji me re dibêjin cezayê wan 6 mehan hat taloqkirin. Em van tiştan naxwazin û tu kes ser soza xwe nasekine. Em naxwazin zarokên me bimirin û infazên wan were şewitandin.”