
‘Bi avakirina Serokatiya Cemxaneyê dixwazin qeyûm tayinî elewîtiyê bikin' 

2022-10-20 09:01:42


	&nbsp;

	STENBOL - Rêxistinên elewiyan anîn ziman ku desthilat wekî meseleyeke ewlehiyê li elewiyan mêze dike û Serokatiya Çand û Cemxaneyê ya Elewî Bektaşiyan jî wekî tayinkirina qeyûm pênase kirin.&nbsp;

	&nbsp;

	Serokkomarê AKP'î Tayyîp Erdogan di 7'ê Cotmehê de daxuyandibû ku dê "Serokatiya Çand û Cemxaneyê ya Elewî Bektaşiyan" ava bikin. Rêxistinên elewiyan bertek nîşanî vê daxuyaniya Erdogan dan.&nbsp;

	&nbsp;

	'DIXWAZIN ELEWÎTIYÊ VEGUHERÎNIN SUNÎTIYÊ'

	&nbsp;

	Hevseroka Giştî ya Komeleyên Elewiyên Demokratîk (DAD) Kadriye Dogan destnîşan kir ku Erdogan dixwaze rejîma îslamî ava bike û elewiyan jî wekî "pêbend" dibîne û wiha got: "Ji lew re elewîtî û îslam ne wekhev in, baweriyên cuda ne. Elewîtî ji roja roj de li ser esasên jiyana wekhev e û demokrasiyê ye. Gava elewîtî di warê civakî de bê avakirin dê meseleya xwezayê, meseleya jinê û meseleya demokrasiyê ji holê rabe."&nbsp;

	&nbsp;

	Doganê bibîr xist ku berê jî bi projeyên "mizgeft cemxaneyê" hewldanên ji bo elewîtiyê veguhere sunîtiyê hatiye çêkirin. Doganê gotina Erdogan ku gotibû "em ê rê nedin elewîtiyeke jirêderketî" bibîr xistin û got ku vê yekê jî wekî rojanekirina feraseta "jirêderketî" û heqaretekê dihesibînin. Doganê destnîşan kir ku desthilat wekî meseleyeke ewlehiyê li elewîtiyê mêze dike û got ku elewî doza hevwelatiyê dikin.&nbsp;

	&nbsp;

	TAYINKIRINA QEYÛM

	&nbsp;

	Doganê diyar kir ku Erdogan bi serokatiya cemxaneyê dixwaze "qeyûm" tayinî baweriya elewîtiyê bike û got ku ev yek dê nebe cihê daxwazên elewiyan û elewî dê rayê nedin van polîtîkayan.&nbsp;

	&nbsp;

	Doganê bi lêv kir ku heya hevrûbûn çênebe, daxwaz neyên qebûlkirin û rêxistinên elewî wekî muxatab esas neyên girtin dê tu encam bi dest nekevin.&nbsp;

	&nbsp;

	PÊNGAVEKE JI BO HILBIJARTINÊ

	&nbsp;

	Serokê Federasyona Komeleyên Elewiyan (ADFE) Celal Firat jî anî ziman ku avakirina serokatiya cemxaneyê pêngaveke ji bo hilbijartinê ye û got ku tekane daxwaza wan ew e ku cemxane bi awayekî qanûnî esas bên girtin. Firat destnîşan kir ku serokatiya ku dê bê avakirinê wekî mudaxileyeke li elewîtiyê şîrove kir û bang kir ku daxwazên elewiyan di çarçoveyeke demokratîk de bên qebûlkirin.&nbsp;