
'Bersûcên Doza Jîtemê ya Kerboranê ceza bikin' 

2022-10-29 14:11:16


	&nbsp;

	STENBOL – Dayikên Şemiyê, ji bo kesên ku 27 sal berê li Kerboranê bi îşkenceyê hatibûn qetilkirin û ew xistibûn bîran, doza edaletê kirin û xwestin ku 18 bersûcên Doza Jîtemê ya Kerboranê bên cezakirin.

	&nbsp;

	Dayikên Şemiyê, ji bo li aqûbeta windayan bipirsin û kiryar bên darizandin, çalakiya xwe ya 918'an ku her hefte li dar dixin, bi awayekî onlîne li dar xistin. Di çalakiya îro de ji bo 2 jê zarok 6 kesên ku di navbera 28'ê Cotmeh-8'ê Mijdara 1995'an de li Kerborana Mêrdînê ji aliyê esker û cerdevanan di avêtina ser malê de hatibûn binçavkirinh û paşê di binçavan de bi îşkenceyê hatibûn qetilkirin û wekî "Doza Jîtemê ya Kerboranê" tê zanîn, doza edaletê kirin. Gelek xizmên windayan tevlî çalakiyê bûn. Rêvebira Komeleya Mafên Mirovan (ÎHD) a Şaxa Mêrdînê Hîcran Erdînç metna daxuyaniyê xwend.&nbsp;

	&nbsp;

	JI BO FÎNCANCIYÊ DOZA EDALETÊ KIRIN

	&nbsp;

	Erdînçê di destpêka axaftina xwe de bal kişand ser girtina Seroka Yekîtiya Bijîşkên Tirk (TTB) Şebnem Korûr Fîncanciyê ku ji ber daxuyaniya xwe ya têkildarî bikaranîna çekên kîmyewî yên ji aliyên Hêzên Çekdar ên Tirk (TSK) ve hatibûn bikaranîn hatibû girtin û got: "Girtina Fîncanciyê mînaka dawî ya biryarên bêhiqûqî ya darazê ye."

	&nbsp;

	Erdînçê got ku ew ji bo Fîncanciyê doza edaletê dikin.&nbsp;

	&nbsp;

	CENDIRME: ÇÛNE ÇIYÊ

	&nbsp;

	Erdînçê bibîr xist ku 27 sal berê li Kerboranê di avêtina ser malan de leşker û cerdevanan gelek kes binçav kirine û ew birine Tabûra Cendirmeyan a Kerboranê û paşê hatine berdan û got ku lê Davût Altûnkaynak ê 12 salî, Seyhan Doganê 13 salî, Nedîm Akyonê 16 salî, Mehmet Emîn Aslanê 19 salî, Abdûrrahman Olcayê 20 salî, Abdûrrahman Coşkûnê 21 salî û Suleyman Seyhanê 57 salî careke din venegeriyane malê. Erdînçê anî ziman ku piştî ku malbatan li aqûbeta xizmên xwe pirsiye, cendirmeyan ji wan re gotiye "piştî lêprisînê hatin berdan, çûne çiyê." Erdînçê ragihand ku lê piştî bûyerê bi 4 mehan, di 6'ê Adara 1996'an de bedena bêserî û şewitandî ya Suleyman Seyhan di bîrekê de hatiye dîtin.&nbsp;

	&nbsp;

	Erdînçê destnîşan kir ku piştî dîtina bedena bêruh ya Seyhan bi du rojan çawîşê psipor Bîlal Batirir ku van qewimînan digihîne meqamên bilind ên tabûr jî tê windakirin.&nbsp;

	&nbsp;

	EŞKERE BÛ KU EW DI BÎRAN DE VEŞARTINE

	&nbsp;

	Erdînçê diyar kir ku piştî ku ÎDH'ê di 29'ê Gulana 2009'an de cardin serlêdan kiriye, dosye cardin hatiye vekirin û got ku piştî ku Serdozgeriya Komarê ya Kerboranê cardin dosye vekiriye, derket holê ku winda di binçavan de hatine kuştin û ew avêtine bîran.&nbsp;

	&nbsp;

	HATIN BERDAN

	&nbsp;

	Erdînçê ev tişt gotin: "Di 2012-2015'an de piştî bîr hatin kolandin, hestî hatin dîtin. Îdianameya dozger ji aliyê dadgehê ve hat qebûlkirin. Fermandarê Tabûra Cendirmeyan a Mêrdînê ya wê demê Hurşît Îmren, Fermandarê Cendirmeyan a Navçeyê Mehmet Tîre, Fermandarê Qereqola Cendirmayan a Navendî ya Kerboranê Mahmût Yilmaz, Cigirê Fermandarê Qereqolê Haydar Topçam û ÇAwîşê Pispor Kerîm Şahînm jî di nav de der barê 18 bersûcan de doz hat vekirin. Di dozê de ku li Dadgeha Cezayê Giran a 1'ê ya Semsûrê hat lidarxistin, kuştina 7 kerboraniyan û çawîşê pispor Bîlal Batirir di qeydên dadgehê de bi hurgulî hatin tomarkirin." Erdînçê diyar kir ku lê bersûc bi hinceta ku "delîlên teqez bi dest neketine" beraet kirine.&nbsp;

	&nbsp;

	‘ÊN DOZÊ BÊSÛC HIŞTIN SÛCDAR IN'

	&nbsp;

	Erdînçê ragihand ku piştî vê serî li Dadgeha Edliye ya Herêmê ya Dîrokê dane û îtiraz kirine. Erdînçê got: "Em bang li Dadgeha Edliye ya Herêmê ya Dîlokê dikin; gava we dosye nirxand beyanên şahidan ên der heqê bersûcan û delîlên di dosyeyê de esas bigrin. Ji bîr nekin kesên ev sûc kirine, kesên ser sûc nixumandine û kesên ew bê ceza hiştine li bara wijdanê mirovan sûcdar in. Çend sal derbas dibin bila bibin, em ê her tim doza edaletê bikin ji bo windayên xwe yên kerboranî."&nbsp;

	&nbsp;

	&nbsp;