
Rojiya mirinê ya li Girtîgeha Makuyê didome: Girtî xistin hucreyên yekkesî 

2022-11-10 14:59:36


	&nbsp;

	WAN - Endamê Meclisa Giştî ya HDP’a Agiriyê Mehmet Bîrdal û ajokarên TIR’an Farûk Cansever û Mahmût Kandemîr li Girtîgeha Makuyê dest bi rojiya mirinê kiribûn. Ji bo ku girtî nekarin bi derve peywendiyan deynin, xistin hucreyên yekkesî.&nbsp;

	&nbsp;

	Endamê Meclisa Giştî ya Partiya Demokratîk a Gelan (HDP) a Agiriyê Mehmet Bîrdal ku ji bo bazirganiyê çûbû Îranê û ajokarên TIR’an Farûk Cansever û Mahmût Kandemîr dest bi çalakiya rojiya mirinê kiribûn. Çalakiya wan di roja 10’an de didome.&nbsp;

	&nbsp;

	Her sêyan jî dan zanîn ku bi awayekî derhiqûqî hatine girtin û li dijî binpêkirinên li girtîgehê, di 1’ê mijdarê de lêvên xwe dirûtin û dest bi rojiya mirinê kirin. Hat ragihandin ku her sê girtî jî li girtîgehê rastî binpêkirinên giran tên.&nbsp;

	&nbsp;

	XISTIN HUCREYÊN YEKKESÎ

	&nbsp;

	Rêveberiya girtîgehê nahêle ku girtî peywendiyan bi derve deynin û rojek piştî roja ku dest bi çalakiya rojiya mirinê kirin, her yek ji wan xistine hucreyeke yekkesî. Hat ragihandin ku rewşa girtiyan her ku diçe xerabtir dibe û ji girtiyan Bîrdal û Kandemîr nikarin rabin ser pêyan.&nbsp;

	&nbsp;

	ÇI BÛBÛ?&nbsp;

	&nbsp;

	Mehmet Bîrdal, 15 meh berê ji bo bazirganiyê çûbû Îranê û ji hêla polîsên rejîmê ve hatibû binçavkirin. Rejîmê, bi îdiayên “Endamtiya PKK û PJAK’ê”, “alîkarîdayîna PKK’ê”, “Hevkariya bi komên dijmin re”, “propagandaya rêxistinê” û “Gefa li dijî &nbsp;ewlekariya neteweyî” 16 sal cezayê hefsê da Bîrdal. &nbsp;

	&nbsp;

	Di heman demê de Mahmût Kandemîr jî li ser sînor bi hinceta ku benikên emeliyatê di TIR’a wî de hatine dîtin, 6 meh cezayê hefsê û 5 milyar û 216 milyon (nêzî 16 milyon TL) jî cezayê pereyan lê hat birîn. Faruk Cansever jî bi heman hincetê hate girtin û nêzî 3 milyon û 500 hezar TL cezayê pereyan lê hat birîn.&nbsp;

	&nbsp;

	Girtiyan li dijî binpêkirinên rêveberiya girtîgehê, di 1’ê mijdarê de devên xwe dirûn û dest bi çalakiya rojiya mirinê kirin.&nbsp;

	&nbsp;