
Prof. Dr. Şebnem Korûr Fîncanci nehat tehliyekirin

2022-12-23 14:18:52


	&nbsp;

	STENBOL - Dozger di danişîna doza Seroka TTB’ê Prof. Dr. Şebnem Korûr Fîncanci de ji îdiaya “propaganda rêxistinê” di asta jor de ceza xwest. Dadgehê jî biryara dewama girtina Fîncanci da.&nbsp;

	&nbsp;

	Seroka Konseya Navendî ya Yekitiya Tabîbên Tirk (TTB) Prof. Dr. Şebnem Korûr Fîncanci ji ber gotin û nirxandina têkildarî çekên kîmyewî ku Tirkiyeyê li başûrê Kurdistanê li dijî endamên HPG’ê bikar anîbû bi îdiaya “propaganda rêxistinê kirye” hatibû girtin. Îro danişîna ewil a doza Fincnci li 24’emîn Dadgeha Cezayê Giran a Çaglayana Stenbolê hat lidarxistin.&nbsp;

	&nbsp;

	‘EM LÊGERÎNERÊN HEQÎQETÊ NE’&nbsp;

	&nbsp;

	Fîncanci di danişînê de bi berfirehî parastina xwe kir û bal kişand ser xebatên xwe yên zanist û destnîşan kir ku xebatên wê yê zanistî berovajî hatine belavkirin û li dijî xebatên wê kampanya lînckirinê hatiye destpêkirin. Fîncanci diyar kir ku bal kişand ser girîngiya pîşeya bijîşkiyê û anî ziman ku hekîmtî ango bijîşkî heqîqetê derdixe holê û got: “Em lêgerînerên heqîqetê ne.”&nbsp;

	&nbsp;

	Fîncanci destnîşan kir ku wê bi dehan xebat li ser kîmyasalê kirine û gelek makale û pirtûk li serê nivîsandine û ew di qada xwe de pispor e û xebata wê ya li ser çekên kîmyewî hatine terorîzekirin. Fîncanci anî ziman ku deynê stûyê wê ye ku mirovahiyê biparêze û xebata xwe ya di warê pisporî de bike.&nbsp;

	&nbsp;

	Parêzerên Fîncanci jî parastina miwekîla xwe kirin û destnîşan kirin ku miwekîla wan li ser fermana îktidara siyasî hatiye girtin. Parêzeran xwestin miwekîla wan bê berdan.&nbsp;

	&nbsp;

	XWESTEKA CEZAKIRINÊ

	&nbsp;

	Piştî parastina parêzeran dozger xwest di asta jor de li gorî xala 7/2 a TMK’ê de ceza li Fîncanci bê birîn û girtî bê darizandin.&nbsp;

	&nbsp;

	DANIŞÎN HAT TALOQKIRIN&nbsp;

	&nbsp;

	Piştî navberê heyeta dadgehê biryar da ku Fîncanci girtî bê darizandin û danişînê taloqî 29'ê kanûnê kir.&nbsp;

	&nbsp;