
ESP û SGDF dê greva birçîbû li bajarên cuda bidomîne  

2023-01-17 11:52:38


	ÎZMÎR – Nûnerên ESP û SGDF’ê bi mebesta bidawîkirina tecrîda li Îmraliyê û binpêkirinên mafan ên li girtîgehan, dest bi greva birçîbûnê kiribûn. Çalakiya greva birçîbûnê dê li bajarên cuda bên domandin.&nbsp;

	&nbsp;

	Partiya Sosyalîst a Bindestan (ESP) û Federasyona Komeleyên Ciwanên Sosyalîst (SGDF) bi mebesta protestokirina tecrîda girankirî ya li ser Rêberê PKK’ê Abdullah Ocalan û binpêkirinên li girtîgehan, duh li pêşiya Girtîgeha Kiriklar a Îzmîrê dest bi çalakiya greva birçîbûnê ya 3 rojan kiribûn. Çalakî dê heta sibe li avahiya ESP’a Îzmîrê bidome. Gelek nûnerên partiyên siyasî, rêxistinên mafên mirovan, malbatên girtiyan û welatî diçin serdana çalakvanan. Piştî Îzmîrê jî dê çalakiya greva birçîbûnê ya ji bo 3 rojan di 18’ê çileyê de li Stenbolê û di 21’ê çileyê de jî li Edeneyê bidome.&nbsp;

	&nbsp;

	GIRTIYÊN NEXWEŞ TÊN KUŞTIN’&nbsp;

	&nbsp;

	Kesên di greva birçîbûnê de têkildarî çalakiya xwe axivîn. Hevseroka SGDF’ê Yaren Tuncer bal kişand ser binpêkirinên li girtîgehan û xespkirina mafên girtiyan û wiha got: “Ji bo şikandina vîna girtiyan serî li her sepanê didin. Nêzî hezar û 600 girtiyên nexweş hene û ji van rewşa 600’an giran e. Nikarin bi tena serê xwe li girtîgehê bijîn. Girtiyên nexweş, li girtîgehan tên kuştin.”&nbsp;

	&nbsp;

	'BILA TECRÎDA LI ÎMRALIYÊ BI DAWÎ BIBE’&nbsp;

	&nbsp;

	Bi domdarî Tuncer anî ziman ku li girtîgehan tecrîd û îşkence heye û wiha domand: “Divê hemû kes li dijî van binpêkirinan dengê xwe derxîne. Em dixwazin balê bikişînin ser tecrîda girankirî ya li ser Abdullah Ocalan. Em ê di nava 3 rojan de rewşa girtiyên şoreşger têxin rojevê. Ji bo wan dikare çi were kirin em ê di vê mijarê de bi raya giştî ya demokratîk re nîqaşan bikin û encamên şênber derxînin holê.”&nbsp;

	&nbsp;

	'DIVÊ EM BIBIN QÎRÎNA WAN’&nbsp;

	&nbsp;

	Ji ESP’ê Tamer Aydin jî diyar kir ku îktîdara AKP-MHP’ê dixwaze hem li hundir û hem jî li derve serî bi şoreşger, demokrat û Tevgera Azadiyê ya Kurd bide tewandin û wiha pê de çû: “Divê em jî li dijî vê hewldanê têkoşîneke hevpar bidin. Bi vê mebestê me dest bi çalakiya greva birçîbûnê kir. Me tu carî serî netewand û dê netewînin. Dixwazin me teslîm bigirin lê em teslîm nebûn. Rêya rizgariya ji van pirsgirêkan, muxalefeta civakî ye. Ji bo vê hewceye em kolanan birêxistin bikin û bibin qîrîna wan.”&nbsp;

	&nbsp;

	BANGA PIŞTEVANIYÊ&nbsp;

	&nbsp;

	Rêveberê ESP’a Îzmîrê Bîrkan Polat jî da zanîn ku tecrîda li girtîgehan bi rêya ATK û şewitandina înfazan tê domandin û ev bang kir: “Ji bo ku îşkenceyên li ATK’ê bi dawî bibin, rojname, kovar û pirtûk ji bo girtiypên siyasî neyên bisînorkirin, tecrîda li ser Rêberê Gelê Kurd bi dawî bibe û hevdîtinên bi parêzer û malbatan re çêbibin me dest bi greva birçîbûnê kir. Banga me ji bo raya giştî ya demokratîk û şoreşger, ji bo nivîskar û rewşenbîran ew e ku bibin dengê girtiyan.”&nbsp;

	&nbsp;

	Çalakiya greva birçîbûnê dê sibe saet di 18.00’an de li Kulturpark a li Şanoya Ciwanan bi temaşekirina fîlmê “Mirin di xewê de bû” (Olum Uykudaydı) bi dawî bibe.&nbsp;

	&nbsp;