
Hê jî der barê polîsên ku îşkence li welatiyekî kirin îdianame nehatiye amadekirin   

2023-01-27 09:01:19


	EDENE - Li Edeneyê lêpirsîna der barê polîsan de ku hem li kuçeyê hem jî li qereqolê li E.E. xistibûn, 11 meh in bi dawî nebûye.&nbsp;

	&nbsp;

	Li Edeneyê di 5'ê Adara 2022'yan de polîsan hem li derve hem jî li qereqolê li E.E. xistibûn ku hatibû diyarkirin li ser wî tiryak heye û ji noqteya lêgerînê ya polîsan reviyaye. E.E., bi rêya parêzerê xwe Baran Taygûn Metîn, di 17'ê Adarê de giliyê polîs A.T., A.O., H.U. û G.G. kiribû. Serdozgeriya Komarê ya Edeneyê jî bi sûcê "birîndarkirina qestî" der barê her 4 polîsan de lêpirsîn dabû destpêkirin û îfadeya polîsan û E.E. girtibû.&nbsp;

	&nbsp;

	E.E. ku rapor ji bijîşk wergirtiye, di îfadeya xwe de diyar kiriye ku li Kolana Defneyê ya Taxa Mîthatpaşa ya navçeya Seyhan a Edeneyê hatiye binçavkirin. Polîsan jî îdia kiriye ku wan li E.E. nexistiye, gava reviyaye lingê wî di peyarêyê de aliqiye û ketiye erdê.

	&nbsp;

	Di dosyeya lêpirsînê de hatiye diyarkirin ku li odeya ku E.E. lê hatiye girtin û polîsan lêxistiye, kamera tune bûye.&nbsp;

	&nbsp;

	Parêzerê E.E. Baran Taygûn Metîn, diyar kir ku lêpirsînê hê bi dawî nebûye û veneguheriye dozê. Metîn, anî ziman ku polîsan hem li kuçeyê hem jî li qereqolê li muwekîlê wî xistine û got ku tişta ku polîsan kiriye sûcê "îşkenceyê" ye, lê belê dozgeriyê bi "birîndarkirina qestî" lêpirsîn daye destpêkirin. Metîn da zanîn ku li qereqolê muwekîlê wî gotiye "bêhna min dernayê" û ji nêrdewanan ketiye xwarê û ji ber vê ew rakirine nexweşxaneyê û hatiye emeliyatkirin. Parêzer Metîn destnîşan kir ku heya niha der barê polîsan de doz nehatiye vekirin û got ku armanca vê ew e ku ser dosyeyê bê girtin û polîs bi bêcezatiyê bên xelatkirin.&nbsp;

	&nbsp;

	MA / Hamdûllah Yagiz Kesen

	&nbsp;

	&nbsp;

	&nbsp;

	&nbsp;

	&nbsp;