
Li Amedê xebatên lêgerîn û rizgarkirinê didomin, gel li dijî desthilatdariyê bi hêrs e 

2023-02-07 11:21:56


	&nbsp;

	AMED -&nbsp;Tesîra erdhejên ku navenda wê navçeya Bazarcixa Mereşê ye bandorek mezin li ser Amedê jî kir. Xebatên lêgerîn û rizgarkirinê yên li 7 avahiyên Amedê ku hilweşiyabûn berdewam dike.&nbsp;

	&nbsp;

	Li navçeya Bazarcixê ya Mereşê ku navenda erdhejê ye duh bi pileya 7.7 û 7.6 erdhejên dijwar rûdan. Erdhejê bandorek mezin li ser Amed jî kir û 7 avahiyên mezin hilweşiyan e. Xebatên lêgerîn û rizgarkirinê yên li 7 avahiyên Amedê ku hilweşiyane berdewam dikin.&nbsp;

	&nbsp;

	Li Amedê hejmara miriyan gihîştiye 50 kesî û hejmara birîndaran jî gihîştiye 600 kesî. Nayê zanîn ku çend kes di bin kavilên avahiyan de ne.&nbsp;

	&nbsp;

	LI AVAHIYÊN KU HILWEŞIYANE REWŞA DAWÎ&nbsp;

	&nbsp;

	* Avahiya Işik a 8 qat ku 32 daîreyên wê hene li Cadeya Sentoyê ya navçeya Rezanê ye û duh bi şev 4 kes sax hatin derxistin. Li avahiyê 8 mirî û 10 birîndar hatine derxistin.&nbsp;

	&nbsp;

	* Xebata lêgerînê û rizgarkirinê ya li avahiya Cengîzler a li semta Tesîslera Rezanê jî berdewam dike û duh bi şev cenazeyê jina bi navê M.O. a 70 salî û 2 kesên hatin derxistin. Kesek birîndar jî hat derxistin. Ji heman malbatê 9 kes di bin kavil de ne û ji malbatê heta niha 2 kes hatine derxistin. Ji avahiyê cenazeyê jinek bi navê S. jî hat derxistin û birin nexweşxaneyê. Her wiha saet li derdora 11’an jina bi navê Zeynep Ateşogûllari birîndar hat erxistin. Avahî 7 qatî ye û 24 daîre ye.&nbsp;

	&nbsp;

	* Ji avahiya Yoldaş a li navçeya Rezanê ku li semta Ustkoşeyê ye jî cenazeyên A.C. (55) û kurê wî M.C. hat derxistin û birin nexweşxaneyê. Tê payîn ku caneze îro li Goristana Yenîkoyê bên veşartin.&nbsp;

	&nbsp;

	* Ji avahiya 9 qatî ya Akar a li ser Cadeya Emekê ya Rezanê jî xebata rizgarkirinê didome. Duh bi şev du hevjîn û kesek din bi saxî hatin derxistin. Cenazeyê du kesan jî hat derxistin. Ji duh heta îro cenazeyê 20 kesan ji avahiyê hatiye derxistin û 10 kes jî bi axî hatine derxistin. Tê gotin ku bi giştî 130 kes di bin kavilên avahiyê de ne.&nbsp;

	&nbsp;

	* Ji avahiya Sozel a 9 qatî ku li ser 4 daîreyan e û li semta Ofîsê ya Amedê ye, duh bi şev 5 kes birîndarî hatin rizgarkirin. Heta niha 22 birîndar û cenazeyê 3 kesan ji bin kavilê avahiyê hatiye derxistin û kesek miriye jî zarok bûye.&nbsp;

	&nbsp;

	* Yek ji avahiya ku nîvî hilweşiyaye û nivê din xesarek mezin lê çêbûye jî Navenda Kargehan Diyar Galeria ye û 12 qatî ye. Hat zanîn ku du bi şev 4 kes birîndar ji bin kavil hatine derxistin. Tê gotin heta niha 20 birîndar hatine derxistin û nayê zanîn ku çend kes di bin kavilê avahiyê de mane.&nbsp;

	&nbsp;

	GEL BI HÊRS E&nbsp;

	&nbsp;

	Malbatên ku xizmên wan di bin kavilê avahiya Sozel a li semta Ofîsê de ne li benda xeberek xêr ne û ji ber xebatên têrnekirî û xemsariya desthilatdariyê û şaredariyên di bin rêveberiyên qeyûman de bi hêrs in. Malbatên li derûdora avahiyê disekinin têkildarî xebatên li ser avahiyê tên kirin wiha gotin: “Hemin ku hûn hatine li vir pasta, borek û xwarinê bixwin, dest jê berdin em ê canên xwe ji bin kavilê derxin.”

	&nbsp;

	BÊTELA POLÎSAN: WELATÎ GILÎ DIKIN&nbsp;

	&nbsp;

	Malbatên ku li derûdora avahiya Cengîzler a li semta Tesîslerê li benda xeberek xêrê ne jî bertek nîşanî xemsariya desthilatdariyê didin. Li vir carna di navbera welatî û polîsan de rageşî diqewime. Balkêşe ku di anonsên bêtêla polîsan de anonsa, “Welatî dibêjin hûn karê xwe nakin, ji serê sibehê ve hûn borekan dixwin” hat bihîstin.&nbsp;

	&nbsp;

	JI ERDHEJA XARPÊTÊ REVIYAN E&nbsp;

	&nbsp;

	Mehmet Ozdemîr jî diyar kir ku ew ji erdheja Xarpêtê ya di sala 2020’yan de pêk hat hatine li Galeria bicih bûne û 8 xizmên wî di bin kavilê avahiyê de ne. Ozdemîr bertek nîşanî têrnekirina xebatên lêgerînî da û got xizmên wî bi navê Samed, Suheylan, Fatoş Serrah, Nehîr, Irmak, Serkan, Buket Ozdemîr di bin kavil de ne. Ozdemîr anî ziman ku saniyek jî ji bo wan saniyek e û bi qasî ku tê xwestinê AFAD li vir xebatê nake û xebat ji polîs û leşkeran re hatiye hiştin.&nbsp;

	&nbsp;

	31 CENAZE LI NEXWEŞXANEYÊ NE&nbsp;

	&nbsp;

	Li aliyê din li gorî zanyariyên li ber destan heta niha 31 cenaze rakirine Nexweşaneya Perwerdehiyê û Lêkolînê ya Gazî Yaşargîlê.&nbsp;

	&nbsp;

	PLATFORMA PIŞTEVANIYA BAJÊR: 83 KES MIRIN E&nbsp;

	&nbsp;

	Platforma Parastina Bajêr û Piştevaniyê ya Amedê jî li ser hesabê xwe yê medya dîjîtal ragihand ku 83 kes mirin e, 19 kes bi giranî birîndar bûne û bi giştî 759 kes birîndar hene. Platformê da zanîn ku li tevahiya bajêr 23 avahî hilweşiyane û xwest ku welatî ji avahiyên bi xesar dûr bisekinin.&nbsp;

	&nbsp;