
Danişîna doza qezaya Dêrikê hate lidarxistin  

2023-05-02 12:59:02


	&nbsp;

	MÊRDÎN &nbsp;- Di danişîna doza qezaya Dêrikê de ku 21 kesan jiyana xwe ji dest dabûn hate lidarxistin. Biryar hate dayîn ku rewşa girtî ya bersûcan bidome.&nbsp;

	&nbsp;

	Di 20’ê tebaxa 2022’yan de li navçeya Dêrik a Mêrdînê du TIR’an qeza kiribûn û di encamê de 21 kesan jiyana xwe ji dest dabûn. Derheqê qezayê de doz hatibû vekirin. Danişîna duyemîn a dozê îro li 1’emîn Dadgeha Cezayên Giran a Mêrdînê hate lidarxistin. Ajokar Umut Gunduz û Yûnûs Şatafli ku bi awayekî girtî tên darizandin, li girtîgehên lê tên ragirtin bi rêya Pergala Deng û Dîmen (SEGBÎS) tev li danişînê bûn. Her wiha malbatên kesên jiyana xwe ji dest dayîn û parêzerên aliyan jî di danişînê de amade bûn. Danişîn, piştî tespîtkirina nasnameyan dest pê kir. Parêzeran parastin kirin.&nbsp;

	&nbsp;

	Parêzeran parastinên xwe yên di rûniştinên din de dubare kirin û gotin ku divê di serî de Midûriyeta Giştî ya Rêbejan, xemsariya hemû saziyên têkildar bên tespîtkirin û li dosyayê bên zêdekirin.&nbsp;

	&nbsp;

	Dadgehê, navbereke kin da û piştre biryar da ku rewşa girtî ya Yûnûs Şatafli û Umut Gunduz bidome. Dadgehê biryar da ku xwe li benda rapora kesê pispor bigirin û xwe li benda bersiva muzekkereyên ji saziyên fermî re hatine şandin bigirin.&nbsp;

	&nbsp;

	Danişîna dozê taloqî 20’ê hezîranê hate kirin.&nbsp;

	&nbsp;