
Ozturk: Tecrîdkirina Ocalan tecrîdkirina jiyana bi rûmet e

2023-05-03 17:01:01


	NAVENDA NÛÇEYAN - Hevserokê KCKD’ê û namzetê Partiya Çepên Kesk Berdan Ozturk diyar kir ku Ocalan îradeya bi milyonan kesî ye û got: “Tecrîdkirina Ocalan di heman demê de tecrîdkirina jiyana bi rûmet û demokrasiyê ye.”&nbsp;

	&nbsp;

	Namzetên Parlamenteriyê yên Partiya Çepên Kesk ên Amedê li navenda Amedê, gundan û navçeyan xebatên xwe yên hilbijartinê bênavber didomînin. Hevserokê Kongreya Demokratîk (KCD) û namzetê Partiya Çepên Kesk ê Amedê Berdan Ozturk û şandeya li gel xwe serdana navçeya Hênê kir û li dikandaran geriya û bi gel re civiya.&nbsp;

	&nbsp;

	Şande bi konvoyê ji aliyê şêniyên navçeyê ve hat pêşwazîkirin û xelkê kêfxweşiya xwe nîşan da û dirûşm berz kirin. Ozturk û şandeya li gel xwe serdana dikandaran kirin û paşê li qahwexaneyek bi gel re civiya.

	&nbsp;

	Di civîna gel de namzetê Amedê Samet Menguç ewilî axivî û bal kişand ser komkujiyên li ser kurdan pêk hatine û hê jî tê xwestin kurdan qir bikin.&nbsp;

	&nbsp;

	ÊRIŞÊN LI SER KURDAN

	&nbsp;

	Hevserokê KCD’ê û namzet Berdan Ozturk jî bal kişand ser zextên 8 sal in li dijî gelê kurd pêk tên û got: “Li çar parçeyên Kurdistanê li dijî kurdan êrişên tunekirinê hene. Dixwazin ku kurd serê xwe bitewînin. Kurdên sertewandî dixwazin. Kurdên bêîrade dixwazin. Le ev ne mimkûn e.”

	&nbsp;

	'OCALAN ÎRADEYA BI MILYONAN E’&nbsp;

	&nbsp;

	Ozturk bal kişand ser tecrîdkirina Rêberê PKK’ê Abdullah Ocalan ku 2 sal in agahî jê nayê girtin û wiha got: “Birêz Ocalan pêvajoyek da destpêkirin, di wê pêvajoyê de pozê kesekî jî xwîn nebû. Kurd şer naxwazin. Kurd dixwazin li ser axa xwe biz iman û çand û nasnameya xwe bijîn. Peymana Dolmbahçeyê xera kirin. Di 5’ê nîsana 2015’an de tecrîda girankirî danîn ser birêz Ocalan. Di heman demê de şerek dijwar dan destpêkirin. Lê wê ev tecrîd û şerê wan bi ser nekeve û negihîje encamê. &nbsp;Birêz Ocalan îradeya bi milyonan kesî ye. Tecrîdkirina Ocalan di heman demê de tecrîdkirina jiyana birûmet û demokrasiyê ye.”

	&nbsp;

	Ozturk xwest her kes li dijî faşîzmê hişyar be û dengên xwe bidin Partiya Çepên Kesk û Kemal Kiliçdaroglû.&nbsp;

	&nbsp;

	PASÛR&nbsp;

	&nbsp;

	Namzetên Amedê Adalet Kaya û Serhat Eren jî bi şandeyekê çûn navçeya Pasûra Amedê û serdana dikandaran kirin. Namzet tev li hevdîtina bi gel re bûn. Her wiha namzetan belavokên beyananameya partiya xwe li xelkê belav kirin.&nbsp;

	&nbsp;

	ENQERE&nbsp;

	&nbsp;

	Namzetê parlamenteriyê yên Partiya Çepên Kesk ên Heram 1’emîn ên Enqereyê jî li Guvenparkê standa hilbijartinê vekirin. Ciwanan û jinan bi baldarî li ber standê kom bûn. Turîstên biyanî jî hatin ber standê û agahî wergirtin. Welatiyan da zanîn ku ew ê dengên xwe bidin Partiya Çepên Kesk.&nbsp;

	&nbsp;

	&nbsp;