
YSK’ê îtîraza AKP’a Colemêrgê red kir 

2023-05-19 08:36:19


	&nbsp;

	COLEMÊRG - YSK’ê îtîraza AKP’ê ya ji bo Colemêrgê red kir. Girseya Partiya Çepên Kesk bi gerandina govendê serkeftina xwe pîroz kirin.&nbsp;

	&nbsp;

	Li Colemêrgê li gorî encamên nefermî yên hilbijartinê, di hilbijartina parlamenteriyê de Partiya Çepên Kesk bi 95 hezar û 810 rayan ji sedî 62,45 bi dest xist. AKP’ê jî bi 31 hezar û 644 rayan ji sedî 20,23 bi dest xist û CHP’ê jî bi 11 hezar 86 rayan ji sedî 7,25 bi dest xist. Li gorî vê encamê Partiya Çepên Kesk her sê parlamenteran jî qezenc kir.&nbsp;

	&nbsp;

	Lê belê namzet û rêveberên AKP’ê yên Colemêrgê li ser hev îtîrazî encamên sindoqan kirin. Her çiqas AKP’ê ji bo wekîlek bi dest bixe serî li Desteya Bilind a Hilbijartinê (YSK) da jî lê îtîraza wan hat redkirin.&nbsp;

	&nbsp;

	Partiya Çepên Kesk li dijî her cûre û rêbazên dek û dolaban jî nobeda “demokrasiyê” dabû destpêkirin û bi vê biryardarî û baweriya xwe 3 wekîlan mîsoger kir.&nbsp;

	&nbsp;

	PÎROZBAHÎ&nbsp;

	&nbsp;

	Piştî ku daxwaz ango îtîraza AKP’ê hat redkirin, rêxistinên Partiya Çepên Kesk, HDP û DBP’ê yên Colemêrgê li avahiya HDP’ê pîrozbahî li dar xist û govend hat gerandin û dirûşm hatin berzkirin. Xelkê Colemêrgê bi gerandina govendê serkeftina xwe pîroz kir.&nbsp;

	&nbsp;