
Nûçe weke ‘banga rêxistinê’ hate qebûlkirin: 15 sal cezayê hefsê hate xwestin  

2023-05-24 13:33:22


	&nbsp;

	AMED - Nûçeyên têkildarî daxuyanî, çalakî û xwepêşandanên Hevserokê DBP’a Amedê Hayrettîn Altun tev li bûyî weke “banga rêxistinê” hatin qebûlkirin û 15 sal cezayê hefsê ji bo Altûn hate xwestin.&nbsp;

	&nbsp;

	Serdozgeriya Komarê ya Amedê derheqê Hevserokê Giştî yê Partiya Herêmên Demokratîk (DBP) Keskîn Bayindir û 14 hevserokên bajaran de lêpirsîn dabû destpêkirin. Di 23’yê kanûna 2020’an di çarçoveya lêpirsînê de Hevserokê DBP’a Amedê Hayrettîn Altun jî hatibû binçavkirin û girtin. Altûn heta demekî di girtîgehê de ma. Danişîna doza Altûn hate lidarxistin. Altûn, bi îdiaya “Endamtiya rêxistinê” tê darizandin û doza wî li 5’emîn Dadgeha Cezayên Giran a Amedê hate lidarxistin. Altûn û parêzerên wî hincet nîşan dan û tev li danişînê nebûn. Dozger jî mutalaa xwe pêşkeşî dadgehê kir.&nbsp;

	&nbsp;

	NÛÇE WEKE ‘BANGA RÊXISTINÊ’ HATIN QEBÛLKIRIN

	&nbsp;

	Dozger, di mutalaaya xwe de îdia kir ku Altûn li ser “banga rêxistinê” tev li çalakî û xwepêşandanên partiya xwe û rêxistinên civaka sivîl bûye û ev îdiaya xwe spart nûçeyên têkildarî daxuyanî, çalakî û xwepêşandanên Altûn tev li bûye. Dozger, nûçeyên têkildarî van çalakî û xwepêşandanan weke “Banga rêxistinê” nirxand û îdia kir ku Altûn “sûcê endamtiya rêxistinê” kiriye.&nbsp;

	&nbsp;

	Dozger, di çarçoveya van îdiayan de xwest ku ji 7 sal û 6 mehan heta 15 salan cezayê hefsê li Altûn were birîn.&nbsp;

	&nbsp;

	DANIŞÎN TALOQÎ 12’Ê ÎLONÊ HATE KIRIN

	&nbsp;

	Şandeya dadgehê ji bo Altûn û parêzerên wî li dijî mutalaayê parastina xwe bikin, danişîn taloqî 12’ê îlonê kir.

	&nbsp;