Înfaza Kapan ê 30 sal in girtî ye cara duyemîn hate taloqkirin 

2023-08-11 09:06:10


	ŞIRNEX - Înfaza Osman Kapan ê 30 sal in girtî ye, ji ber ferzkirina “poşmantiyê” qebûl nekiriye cara duyemîn hate taloqkirin. 

	 

	Osman Kapan ê ku di sala 1993’yan de li gundê Xirabaşeref ê navçeya Hezex a Şirnexê di serdegirtina malan de hatibû binçavkirin û bi hinceta “yekitî û yekparebûna dewletê xera kiriye” li Dadgeha Ewlekariya Dewletê (DGM) cezayê girtîgehê yê muebbetê lê hat birîn. Kapan, cezayê lê hatiye birîn di 13 nîsanê de temam kir. Înfaza Kapan ê ferzkirina “poşmantiyê” ya Lijneya Çavdêrî û Îdareyê ya Girtîgeha Tîpa F a Bolûyê qebûl nekir, bi hinceta “ne di rewşeke baş de ye” 3 mehan hate taloqkirin. Berdana Kapan ê taloqkirina wî di 13’ê tîrmehê de bi dawî bû, careke din hate astengkirin. Lijneya Îdare û Çavdêriyê bi heman hincetê înfaza Kapan 4 mehên din taloqkir. 

	 

	Birayê Osman Kapan, Hasan Kapan, da zanîn ku di sala 1993’yan de nêzî 40 kes li Hezexê bi kekê wî re hatin binçavkirin. Kapan, anî ziman ku DGM’ê bi îdiaya "yekitî û yekparebûna dewletê xera kirine" cezayê hefsê yê muebbedê lê birî. 

	 

	DAYIK Û BAVÊ XWE NEDÎTIN 

	 

	Kapan, diyar kir ku kekê wî di pêvajoya girtinê de sirgunî Girtîgehên weke Mêrdîn, Yozgat û Bolûyê yên ji bajarê wan dûr hatiye kirin û wiha got: “Ji sala 2009’an û vir ve li Girtîgeha Tîpa F a Bolûyê ye. Ji ber ku gelekî dûr bû, dema ew sax bû dê û bavê min nekarî biçin wî bibînin. Me gelek caran daxwaznameyek nivîsand ku sewqî cihekî nêz bibe, lê her carê me bersiveke neyînî wergirt. Bavê min bêyî ku bi salan kurê xwe bibîne di sala 2017’an de jiyana xwe ji dest da û diya min jî di sala 2021’an de jiyana xwe ji dest da.”

	 

	Kapan, bi lêv kir ku kekê wî cezayê 30 salan lê hatiye birîn di 13’ê nîsanê de temam kir, divê bê berdan û wiha berdewam kir: “Bi hinceta tev li aktîvîteya civakî nebûye, tev li çalakiya lêdana derî bûye û ferzkirina 'poşmantiyê' qebûl nekiriye, înfaza wî du caran hate şewitandin. Di 13’ê tîrmehê de dema şewitandina înfazê ya 3 mehan bi dawî bû. Lê vê carê bi heman hincetê înfaza wî 4 mehên din hate taloqkirin.”

	 

	‘TIŞTEKÎ KU JÊ POŞMAN BIBE NEKIRIYE’ 

	 

	Kapan, ê bertek nîşanî taloqkirina înfazê da wiha lê zêde kir: “Tevî ku cezayê lê hatiye birîn xelaskiriye jî nayê berdan. Bi vê pêkanînê dixwazin serî bi girtiyan bidin tewandin. Tu hinceteke din nîne. Mûameleya keyfî ye. Piştî 4 mehan cezayê wî biqede jî dîsa berdana wî nediyar e. Ji ber poşman nînin nayên berdan. Ji xwe 30 sal in di hundir de ne, 30 salên din jî di hundir de bin wê poşman nebin. Ji ber ku tiştekî ku jê poşman bibin nekirine. Sûcê di nava sûcî de nabe. Divê rayagiştî ya hestiyar bi girtiyan re di nava piştevaniyê de be. Em jî dibêjin ‘êdî bes e’ û kesên cezayê wan xelas bûn bila bên berdan.”

	 

	MA / Mehmet Guleş