
Kedkarê doza kurd Apê Ûsiv wefat kir  

2023-09-22 12:07:11


	RIHA - Kedkarê doza azadiya kurd Yusuf Berk ku li Rihayê wek Apê Ûsiv tê zanîn di 82 saliya xwe de koça dawî kir.&nbsp;

	&nbsp;

	Yusuf Berk ê 82 salî ku li Rihayê wek Apê Ûsiv û dilxwazek doza azadiyê tê zanîn ji ber nexweşîna pişê wî ku nemabû jiyana xwe ji dest da. Apê Ûsîv bi henek, govend, coş û morale xwe jî dihat nasîn Li Nexweşxaneya Perwerde û Lêkolînê ya Mehmet Akîf Înan dihat tedawîkirin û vê sibehê koça dawî kir. Cenazeyê Apê Ûsiv wê li Goristana Bedîuzzman a li taxa Hizmali ya Halîliyeyê bê veşartin. Malbata Berk wê şîna xwe li Mala Şînê ya Kuşçuoglû ya li taxa Suleymaniyê deyne.&nbsp;

	&nbsp;

	Apê Ûsiv ji navenda Rihayê bû û bi salan cilên xwe yên kurdewarî li sefên pêş ên çalakî û şahiyan cih digirt. Berk cara ewil di nava xebatên Partiya Kedê ya Gel (HEP) cih digire û bi salan li gel wê enerjiya xwe ya berz hema bêje çalakiyek û şahiyek bernade. Apê Ûsiv di hevpeyvînek xwe ya di Ajansa Mezopotamya de diyar kiribû ku wî di sala 1969’an de têkoşîna tevgera azadiya kurd nas kiriye û wî cara ewil di siyaseta kurd de siyasetmedar Ferîdûn Yazar li Stenbolê nas kiriye û bûye mêvanê wî. Apê Ûsiv destnîşan kiribû ku wî Rêberê PKK’ê Abdullah Ocalan jî ji nêz ve nas kiriye û piştî li axaftinên Ocalan guhdar kiriye ew aşiqî têkoşîna azadiya kurd bûye.&nbsp;

	&nbsp;

	'BILA HER KES WERE GOVENDA AZADIYÊ’&nbsp;

	&nbsp;

	Têkoşîna Apê Ûsiv ji HEP’ê heta HDP’ê bêwestan û bênavber bi baweriyek xurt berdewam kir. Ew beşdarî her çalakî û şahiyên li derveyî Rihayê jî dibû. Apê Ûsiv di berxwedana piştgiriya Kobanê de li ser sînorê Pirsûsê, di çalakiyên ji bo piştevaniya cihên wek Cizîrê û Nisêbînê de cih girtiye û roja ku Qetlîama Garê ya Enqereyê pêk hat jî ew ji bo mitîngê li wê qadê bûye lê tiştek bi wî nehatiye.&nbsp;

	&nbsp;

	Berk di hevpeyvîna xwe ya li gel ajansa me de gotibû, “Em ê bi ser bikevin. Wê govenda me ya azadiyê qet nesekine, divê her kes di vê govendê de cihê xwe bigire.”&nbsp;

	&nbsp;