Mezlûm Ebdî, Hakan Fîdan derewand 

2023-10-04 21:33:46


	 

	NAVENDA NÛÇEYAN- Fermandarê Giştî yê QSD'ê Mezlûm Ebdî wiha bersiva Wezîrê Karên Derve Hakan Fîdan da: "Yên ku êrişa li Enqereyê kirin, weke ku rayedarên dewleta tirk îdîa dikin di herêmên me re derbas nebûne. Tirkiye ji bo êrişan li hincetan digere." 

	 

	Fermandarê Giştî yê Hêzên Sûriyeya Demokratîk (QSD) Mezlûm Ebdî, li ser hesaba xwe ya fermî yê X’ê bi peyamekê bersiva daxuyaniya dewleta tirk ya têkildarî çalakiya li hemberî Midûriyeta Giştî ya Polîsan a Tirk hat kirin da ku tê de Rojava hedef digire.

	 

	Daxuyaniya Mezlûm Ebdî wiha ye:

	 

	“Yên ku êrişa li Enqereyê kirin, weke ku rayedarên dewleta tirk îdîa dikin di herêmên me re derbas nebûne. Em ne alîgirê pevçûnên navxweyî yên Tirkiyeyê ne û em teşwîqî zêdebûna van pevçûnan jî nakin. Lêgerîna Tirkiyeyê ya li hincetên ji bo rewakirina êrîşên xwe yên berdewam yên li ser herêmên me û destpêkirina êrîşeke leşkerî ya nû, nîgeraniya me ya kûr zêdetir dike.

	 

	Armanckirina jêrxane û çavkaniyên aborî yên herêmê û bajarên niştecihbûyî tawaneke şer e û me berê jî ev yek dîtibû. Ji ber vê yekê em bang li aliyên garantor û civaka navnetewî dikin ku li hember van metirsiyên dubare helwestên guncaw werbigirin û aramî û aştiyê li herêmê misoger bikin.”