
Li dijî binçavkirin û êrişan nerazîbûn: Em bi paş ve gav navêjin   

2023-10-07 11:16:07


	STENBOL - Nûnerên partiyên siyasî li dijî pêla operasyonên binçavkirinan banga têkoşîna hevpar kirin û gotin: “Em ji desthilatdariyê re dibêjin hodrî meydan, em bi paş ve gav navêjin.”&nbsp;

	&nbsp;

	Di 1’ê cotmehê de li dijî Wezareta Karên Navxweyî ya li Enqereyê êriş pêk hatibû. Piştî êrişê li bajarên Tirkiyeyê û bakurê Kurdistanê pêla operasyonên qirkirina siyasî dest pê kiribûn. Heta niha di serdegirtinên malan de 246 kes hatine binçavkirin. Li aliyekî pêla operasyonên serdegirtinên malan didomin û ev du roj in jî Tirkiye li dijî gund, navçe û bajarên rojavayê Kurdistanê êrişên hewayî pêk tîne.&nbsp;

	&nbsp;

	Desthilatdariya Tirkiyeyê êrişa li Enqereyê dîsa wek her tim kir hinceta êrişkirina li dijî rojavayê Kurdistanê. Nûnerên partiyên siyasî nerazîbûn nîşanî êrişên li ser Rojava û pêla binçavkirin û girtinan dan û bang li hemû hêzên muxalîf kirin ku li dijî êrişan di têkoşîna hevpar de bibin yek û li ber van êrişan rabin.&nbsp;

	&nbsp;

	Cîgira Seroka Giştî ya Partiya Şoreşger Gamze Taşçi bi bîr xist ku desthilatdariya AKP-MHP’ê piştî êrişa li Enqereyê tavilê dest bi operasyonên li dijî kurdan û hêzên şoreşger û êrişên li dijî Rojava kiriye. Taşçi anî ziman ku desthilatdariyê hebûna xwe li ser dijbûna kurdan ava kiriye û ev xwe di operasyonên dawî de jî dide nîşandan. Taşçi diyar kir ku ev êriş di heman demê de li dijî dostên kurdan pêk tên û desthilatdarî peyama, “Xwe ji kurdan dûr bikin, li ser pirsgirêka kurd devê xwe venekin û bi kurdan re neyên ba hev” dide çepgiran.&nbsp;

	&nbsp;

	Taşçi da zanîn ku heke li ber van operasyonên pêla binçavkirinê deng neyê derxistin wê ev operasyon li ser hemû aliyên muxalîf belav bibin û divê li dijî vê yekê xeta têkoşîna hevpar bê avakirin.&nbsp;

	&nbsp;

	‘EM BIBIN YEK HETA KU TECRÎD RABE’&nbsp;

	&nbsp;

	Ji Hêza Têkoşîna Yekbûyî (BMG) Murvet Kuçuk jî da zanîn ku binçavkirina bi sedan kes a bi hinceta çalakiya li Enqereyê nayê qebûlkirin û di heman demê de desthilatdarî êrişî rojavayê Kurdistanê dike û desthilatdarî dixwaze destkeftiyên kurdan û dostên wan tune bike û polîtîkaya xwe ya dagirkeriyê berfireh bike. Kuçuk anî ziman ku divê her kes bi hev re li dijî van êriş û operasyonên desthilatdariya AKP-MHP’ê têkoşînek mezin bike da ku operasyon û êriş bên sekinandin û tecrîda li ser Abdullah Ocalan bê rakirin. Kuçuk got hewcedarî bi têkoşînek hevpar heye û dem dema hevgirtinê ye.&nbsp;

	&nbsp;

	'DIVÊ EM ENIYA BERXWEDANA YEKBÛYÎ AVA BIKIN’

	&nbsp;

	Berdevkê Demê ya Federasyona Meclisên Sosyalîst (SMF) Bariş Kayaoglû jî diyar kir ku piştî hilbijartinê desthilatdariyê kabîneya şer ava kiriye û biryara êrişan û operasyonan ji aliyê vê kabîneyê ve tê dayîn. Kayaoglû bi salane li welêt di serî de li dijî kurdan û hemû hêzên çep û çepgir konspetek berfireh a êrişan hatiye destpêkrin û pêwîste li dijî van êrişan eniya berxwedanek hevpar were avakirin.&nbsp;

	&nbsp;

	Endama Komîteya Navendî ya Partiya Tevgera Kedkaran (EHP) Nehîr Sevîm jî destnîşan kir ku wê operasyonên bi vî rengî tu demê nikaribin kesî têk bibin û bitepisînin û got: “Desthilatdarî bi van operasyonên xwe peyama ku wê di polîtîkayên xwe yên şer ên li dijî kurdan û aliyên demokratîk bide domandin dide. Divê em li dijî van êrişan bibin yek. Çimkî ev êriş û operayson li dijî hemû aliyên demokratîk hatiye kirin. Em bi awayek yekbûyî û hevpar li dijî vê rabin.”&nbsp;

	&nbsp;