Ûca: Tirkiye dixwaze DAIŞ'ê car din bi ruh û can bike

2023-10-18 09:02:47


	STENBOL - Siyasetmedar Feleknas Ûca anî ziman ku Tirkiye dixwaze li Bakur û Rojhilatê Sûriyeyê car din DAIŞ'ê bi ruh û can bike.

	Tirkiye ji 4'ê cotmehê ve êrişî Bakur û Rojhilatê Sûriyeyê dike. Di van êrişan de binesaziya herêmê, saziyên xizmetê, navendên stratejîk û sivîlan hedef digire. Ji roja êriş dest pê kirine heya niha zêdetirî 30 sivîl jiyana xwe ji dest dane û gelek kes jî birîndar bûne. 

	 

	Parlamentera Partiya Demokratîk a Gelan (HDP) a berê Feleknas Ûca sedema hedefgirtina Bakur û Rojhilatê Sûriyeyê û bêdengiya li hemberî van êrişan nirxand. 

	 

	Ûca bibîr xist ku piştî çalakiya 1'ê cotmehê ya li hemberî Wezareta Karên Navxweyî bi çend saetan desthilatê dest bi hedefgirtina Herêma Xweser kiriye û ji bo êrişê hincetek an jî hincetek afirandiye û got ku piştî van daxuyaniyan dibistan, nexweşxane, mizgeft û tesîsên enerjiyê yên herêmê hedef hatine girtin û di van êrişan de jin û zarok jî di nav de gelek kes jiyana xwe ji dest dane. 

	 

	Ûca diyar kir ku gefên li herêmê tên xwarin û êrişên tên kirin ne cara yekem in û gotinên Serokê MÎT'ê yê berê Hakan Fîdan bibîr xistin ku gotibû 'Ger hewce be ez ê çar zilaman bişînim Sûriyeyê. Ez ê 8 fuzeyan bavêjim Tirkiyeyê û şerekî bidim destpêkirin.'

	 

	‘KONSEPTEKE NÛ'

	 

	Ûca bibîr xist ku Tirkiyeyê piştî êrişa bombeyî ya di 13'ê mijdara 2023'yan de li Kolana Îstîklalê pêk hat jî herêma xweser hedef girtiye û got ku ev êriş hemû ji bo berterefkirina destkeftiyên kurdan e. Ûca bilêv kir ku Tirkiye ji bo jiholêrakirina destkeftiyên kurdan berê jî plansaziya tevgereke bejahiyî kiriye û ev tişt anî ziman: "Lê belê hêzên koalîsyonê yên li herêmê rê nedan vê yekê. Piştî êrişa Taksîmê, plansaziyeke wan a bi vî rengî hebû. Lê niha destûra êrişên hewayî dan. Ji lew re êrişên hewayî yên li herêmê di destê hêzên koalîsyonê de ne, di destê DYA û Rûsyayê de ne. Ger ev hêz destûrê nedin, Tirkiye nikare bike. Bi van êrişan re li hemberî Rojavayê konsepteke nû ket dewrê. Du hefte ne her roj êriş tên kirin. Bêdengiya raya navneteweyî jî nîşan dide ku destûr avan êrişan hatiye dayîn." 

	 

	Ûca destnîşan kir ku Tirkiye bi van êrişan hewl dide car din DAIŞ'ê bi ruh û can bike. 

	 

	Ûca anî ziman ku bêdengiya hêzên global jî ew e ku dixwazin pergaleke pasîf û bêvîn bê avakirin û got: "Armanc qelskirina hêza rêxistinkirî ye ku rêya sêyem diparêze." 

	 

	HELWESTA DURÛ REXNE KIR

	 

	Ûca destnîşan kir ku ew mirina sivîlan ên di êrişên Îsraîlê yên li ser Filistînê û hem jî yên di êrişên Tirkiyeyê yên li ser Bakur û Rojhilatê Sûriyeyê de qebûl nakin û şermezar dikin. Ûca bilêv kir ku kesên van êrişan dikin xwedî heman ferasetê ne û got ku bertekên li dijî êrişên Îsraîlê divê li dijî êrişên Tirkiyeyê jî bên nîşandan. Ûca, wiha domand: "Di serî de welatên Ewropayê gelek welatan li dijî êrişên Filistînê deng derxistin, lê ji bo yên li Rojava xwe li bêdengiyê datînin. Ev gelê filistînê be û gelê kurd be, qet ferq nake divê deng bê derxistin. Divê cihêkarî neyê kirin. Divê piştgiriya gelê mezlûm bê kirin. Partiyên çepgir di civînên Konseya Ewropayê de ev tişt gotin. Wan jî bertek nîşanî vê bêdengiyê dan û rexne kirin."

	 

	‘DIVÊ CÎHAN RABE SER PÊYAN'

	 

	Ûca bang li raya giştî ya cîhanê kir ku vê konsepta êrişan a li dijî gelê kurd şermezar bike û rê nede wê û wiha dawî li axaftina xwe anî: "Divê em ji her kesî re mafdariya berxwedana gelê kurd û hêza wê bibêjin. Divê em têkoşîna xwe ya li dijî vê faşîzmê bilind bikin. Gel, divê li dijî van êrişan rabe ser pêyan. Di serî de gelê kurd û dostên wan divê li seranserê cîhanê her kes rabe ser pêyan li dijî van êrişan. Divê em dîplomasiyê jî baş bikin. Îro li Rojava sûcê şer tê kirin. Çawa kurdan berxwedana Kobanê rê cîhanê da, divê niha jî wiha bike." 

	 

	MA / Ergîn Çaglar