
Qeyûm tabelaya bi kurdî rakir

2023-12-08 09:53:54


	&nbsp;

	AMED - Qeyûmê Şaredariya Bismilê tabelaya têketina Taxa Seletê ya bi kurdî li ser “Hûn bi xêr hatin” rakir û li şûna wê tabelayeke tirkî bi cih kir.&nbsp;

	&nbsp;

	Qeyûmê Şaredariya navçeya Bismil a Amedê tabelaya bi kurdî ya “Hûn bi xêr hatin” a di ketina Taxa Seletê de rakir û li şûna wê tabelaya bi tirkî bi cih kir.&nbsp;

	&nbsp;

	Herwiha tabelayên bi kurdî yên “Selet” û “Seleta Jor” jî da rakirin û li şûna wan tabelayên bi tirkî bi cih kir.&nbsp;

	&nbsp;

	Taxa behsa xeberê beriya Qanûna Şaredariya Bajarê Mezin bajarok bû, û Partiya Aştî û Demokrasiyê (BDP) di sala 2015’an de tabelaya kurdî ya “Hûn bi xêr hatin” di têketina taxê de bi cih kiribû.&nbsp;

	&nbsp;

	Hevşaredarê Bismilê Orhan Ayaz ê qeyûm li şûna wî hatiye tayînkirin, bertek nîşanî jêkirina tabelayên bi kurdî da.&nbsp;

	&nbsp;

	AYAZ: ŞOPA POLÎTÎKAYÊN ÎNKARÊ YE

	&nbsp;

	Orhan Ayaz, da zanîn ku rakirina tabelayan şopa polîtîkayên inkarkirinê ne. Ayaz, destnîşan kir ku bêtehemûliya desthilatê ya li dijî zimanê kurdî berdewam dike û got: “Derveyî polîtîkayên ewlehiyê, ji bo kurdan di ajandaya desthilatê de tiştek nîne. Bi sepanên qeyûman re destkeftiyên di nava 100 salên komarê de hatin bidestxistin jî ji holê hatin rakirin.”&nbsp;

	&nbsp;

	‘DÊ TÊKOŞÎNA ME YA LI DIJÎ FERASETA ÎNKARÊ BIDOME’

	&nbsp;

	Ayaz, da zanîn ku feraseta qeyûm “feraseta talanê” ye û wiha axivî: “Bi xespkirina vîna gel û pratîkên qeyûmên hatine tayînkirin, li her derê wekhev in. Tê dîtin ku redkirina nasname, çand, ziman, hemû nirxên gel û asîmîlasyon têrî desthilata faşîst nekiriye. Di heman çarçoveyê de polîtîkayên planên têkbirinê xistin dewrê, vîna gel tune hesibandin. Polîtîkayên tayînkirina qeyûman û kirinên wan yên rûyê mirov reş dikin, tên dîtin. Bi salan e mînakên kirinên derveyî aqil, di navçeya me ya Bismilê de jî tên sepandin. Li dijî vê feraseta înkarê têkoşîna me dom kir, dê bidome jî.”

	&nbsp;