
Dayikên Şemiyê aqûbeta nivîskar Sabahattîn Alî pirsîn  

2024-04-06 14:09:19


	STENBOL - Dayikên Şemiyê di çalakiya vê hefteyê de aqûbeta nivîskar Sabahattîn Alî pirsîn ku 76 sal berê hatibû binçavkirin û windakirin û banga bidawîkirina bêedaletiyê kirin.&nbsp;

	Dayikên Şemiyê/Mirovên Şemiyê ji bo pirsîna aqûbeta kesên di dema binçavkirinê de hatine windakirin û qetilkirin û darizandina faîlên wan, di hefteya 993’yemîn de li Qada Galatasarayê ya Stenbolê hatin gel hev. Çalakvanan qurnefîl û dovîzên wêneyên windakiriyan li ser bûn hilgirtin. Parlamentera DEM Partiyê ya Stenbolê Ozgul Sakî, Hevberdevkê Komîsyona Çand û Hunerê yê DEM Partiyê Kerem Firtina, Hevseroka Giştî ya ÎHD’ê Eren Keskîn û rêveberên şaxa komeleyê ya Stenbolê tev li çalakiya vê hefteyê bûn.&nbsp;

	&nbsp;

	Di çalakiya vê hefteyê de aqûbeta nivîskar Sabahattîn Alî hate pirsîn ku di 31’ê adara sala 1948’an de ji bo biçe derveyî bajar ji Stenbolê derketibû û ji wê rojê ve agahî jê nayên girtin. Daxuyanî ji hêla Endama Komîsyona li Dijî Windakirinan a ÎHD’ê Sebla Ercan ve hate xwendin. Ercan, got ku di 76’emîn sala windakirina Alî ya ji hêla dewletê ve hatine gel hev û diyar kir ku dê aqûbeta Alî di tariyê de nemîne. Ercan, anî ziman ku malbata Alî ji daxuyaniya fermî ya dewletê qaneh nebûye û wiha domand: “Dewlet dibêje ku Alî dema direviya Bulgaristanê, ji hêla qaçaxçiyekî neteweperest ve hatiye kuştin. Lê xizmên Alî dibêjin ku li emniyeta Kirklareliyê bi îşkenceyê hatiye qetilkirin û cenazeyê wî hatiye windakirin.”&nbsp;

	&nbsp;

	'DERHEQÊ WÎ DE LÊPIRSÎN TÊN VEKIRIN’&nbsp;

	&nbsp;

	Bi domdarî Ercan diyar kir ku Alî nelirêtî û xizaniya wê demê vedigot lewma bi propagandayê dihat sûcdarkirin, derheqê wî e lêpirsîn dihatin vekirin, cezayê girtinê dihat dayîn û pirtûkên wî dihatin qedexekirin. Ercan, da zanîn ku Alî ji ber zexta neçar ma ku bixwaze biçe Ewropayê lê li ser sînor hate girtin û bi îşkenceyê hate qetilkirin. Ercan, wiha bi dawî kir: “Divê ev bêedaletiya 76 sal in didome bi dawî bibe. Divê cihê gora Alî were eşkerekirin û pêvajoya windakirina wî were zelalkirin. Divê dosyaya Sabahattîn Alî ya veşarî ya li Midûriyeta Giştî ya Arşîvên Dewletê bê eşkerekirin. Pêşîlêgirtina lêkolînkirina bûyerên windakirinê, tê wateya rewakirina van sûcan.”&nbsp;

	&nbsp;

	Piştî daxuyaniyê, beşdaran qurnefîl danîn Qada Galatasarayê.&nbsp;

	&nbsp;

	

	&nbsp;