
Ji bo hemû girtiyên nexweş banga berdanê hat kirin 

2024-05-25 15:47:50


	&nbsp;

	STENBOL - Di çalakiya Rûniştina F’yê de hat diyarkirin ku girtî Ergun Akdogan di encama xemsarî û binpêkirinan de miriye û ji bo girtiyên nexweş banga berdanê hat kirin.&nbsp;

	&nbsp;

	Komîsyona Girtîgehan a Şaxa Komeleya Mafên Mirovan (ÎHD) a Stenbolê çalakiya “Rûniştina F” di hefteya 635’emîn de li ber avahiya komeleyê li dar xist. Aktîvîstên mafên mirovan beşdarî çalakiyê bûn û bal kişandin ser rewşa Ergun Akdogan ê li Girtîgeha Jimara 2’yan a Tîpa F’yê ya Tekîrdagê ragirtî bû ku di encama xwîna çû ser mêjiyê wî û mir. Pankartên “Mafê girtî mafê mirovan e” û “Tedawî maf e nayê astengkirin” hatin vekirin û dirûşma “Tecrîd dikuje, piştevanî dide jiyîn” hat berzkirin. Berdevka Komîsyonê Hatîce Onaran daxuyanî xwend.&nbsp;

	&nbsp;

	Onaran diyar kir ku di çarçoveya çalakiya Rûniştina F’yê de bi salane daxwaz kirine ku bi sedan girtiyên nexweş bên berdan û ev banga wan gelek caran ji aliyê muxataban ve ji nedîtî ve hatiye. Onaran anî ziman ku ji ber vê xemsariyê gelek girtiyên nexweş mirin û mînaka vê ya dawiyê jî girtiyê nexweş Ergun Akdogan ku li Girtîgeha Tekîrdagê mir.&nbsp;

	&nbsp;

	PIŞTÎ DIMIRE ÎNFAZA WÎ TALOQKIRIN&nbsp;

	&nbsp;

	Onaran bi bîr xist ku Ergun Akdogan 27 sal bûn girtî bû, di 14’ê gulanê de dikeve û xwîn diçe ser mêjiyê û piştî rewşa wî giran dibe radikin Nexweşxaneya Çam Sakûra ya Başaşehîrê û di beşa venêrîna awarte de rewşa wî her diçe girantir dibe û herî dawî jî jiyana xwe ji dest da. Onaran anî ziman ku piştî Akdogan jiyana xwe ji dest da der barê wî de biryara taloqkirina înfaza wî tê dayîn û got ku ji bo Akdogan mafê xatirxwestinê jî nenasîn.&nbsp;

	&nbsp;

	BI SEDAN GIRTIYÊN NEXWEŞ LI BENDA BERDANÊ NE&nbsp;

	&nbsp;

	Onaran destnîşan kir ku ew ê mafê jiyanê û tenduristiyê yên girtiyan heta dawiyê biparêzin û banga berdana hemû girtiyên nexweş kir. Onaran got Ergîn Aktaş, Serdal Yildirim, Hanîfe Arsalan, Abdulalîm Kaya, Abdulkadîr Kuday hin ji van girtiyên nexweş in ku rewşa wan giran in û bi sedan girtiyên ku rewşa wan giran e di girtîgehan de li benda berdanê ne. Onaran ji bo girtiyên nexweş bang li rayedaran kir ku wezîfeya xwe ya hiqûqî û mirovî bi cih bînin û hestiyar nêzî mijarê bibin.&nbsp;

	&nbsp;