
ÎHD’ê banga ‘betalkirina biryara tayînkirina qeyûm’ li îktîdarê kir 

2024-06-07 15:47:32


	&nbsp;

	NAVENDA NÛÇEYAN - Şaxên ÎHD’ê di çalakiyên “Nobeta Aştiyê” yên vê hefteyê de bertek nîşanî tayînkirina qeyûm a li Şaredariya Colemêrgê dan û ev bang kirin: “Biryara tayînkirina qeyûm paşve vekişînin.”&nbsp;

	&nbsp;

	Komeleya Mafên Mirovan (ÎHD) têkildarî binpêkirinên mafên mirovan her hefteyê di roja înê de çalakiya “Nobeta Aştiyê” li dar dixe. Mijara çalakiyê ya vê hefteyê jî tayînkirina qeyûm a li Şaredariya Colemêrgê bû. Bi mijara “Ji bo aştiya civakî rêzê ji bo îradeya gel bigirin” li Wan, Amed û Êlihê çalakî hatin lidarxistin û hat xwestin ku biryara tayînkirina qeyûm a li Şaredariya Colemêrgê were betalkirin.&nbsp;

	&nbsp;

	WAN

	&nbsp;

	Şaxa ÎHD’a Wanê çalakî li avahiya şaxê li dar xist. Endam û rêveberên şaxê tev li nobetê bûn û rêveberê ÎHD’ê Firat Durmaz daxuyanî xwend. Durmaz, bi bîr xist ku tayînkirina qeyûman a di serdema DBP û HDP’ê de dest pê kirin di serdema DEM Partiyê de jî tê berdewamkirin. Durmaz, got ku xetere heye ku biryara tayînkirina qeyûman belav bibe. Durmaz, wiha pê de çû: “Dîmenên piştî tayînkirina qeyûm, rejîma OHAL’ê yên salên 90’î anîn bîra me. Colemêrg, Wan û Amed hatin dorpêçkirin. Ketina Colemêrgê hate qedexekirin û li gelek bajaran rêxistinên civaka sivîl rastî tundiya polîsan hatin, mafê protestoyê bi destê polîsan hate astengkirin. Îktîdara siyasî divê ji bo pêşerojeke demokratîk û aştiyane bi berpirsyartî tevbigere û ji demên berê ji xwe re ders bigire. Em bang dikin biryara tayînkirina qeyûm were betalkirin.”&nbsp;

	&nbsp;

	AMED

	&nbsp;

	Şaxa ÎHD’a Amedê jî li avahiya xwe nobet girt. Nûnerên OHD’ê, rêxistinên civaka sivîl û gelek kes tev li bûn. Serokê Şaxê Ercan Yilmaz bal kişand ser tayînkirina qeyûm û wiha got: “Em jî di Nobeta Aştiyê de daxwaza çareserkirina pirsgirêka kurd dikin û bi tu awayî qeyûman qebûl nakin.”&nbsp;

	&nbsp;

	Piştre jî Cîgira Serokê Şaxê Suzan Mehmedoglû Aksoy metna hevpar xwend.&nbsp;

	&nbsp;

	ÊLIH

	&nbsp;

	Li komeleya şaxê ya Êlihê jî nobet hate girtin. Di nobetê de daxwaza çareserkirina pirsgirêka kurd hate dubarekirin û bang li îktîdarê hat kirin ku ji biryara xwe ya tayînkirina qeyûm vegere.&nbsp;

	&nbsp;

	
		ENQERE&nbsp;
	
		&nbsp;
	
		Di nobeta li Şaxa ÎHD’a Enqereyê hate girtin de pankarta “Ji aştiya civakî û vîna gel re hurmet” hate daliqandin. Ji bilî endam û rêveberên ÎHD’ê, Hevberdevkê Komîsyona Hiqûqê ya Partiya Wekhevî û Demokrasiyê ya Gelan (DEM Partî) Ozturk Turkdogan, rêveberên bajêr û endamên Alinteriyê beşdarî nobetê bûn.&nbsp;
	
		&nbsp;
	
		Hevserokê Şaxê Omer Farûk ê di nobetê de axivî, wiha got: “Divê em careke din bang li desthilata siyasî bikin; Rojhilata Navîn bi lez û bez ber bi şewatekê ve diçe û dibe ku ev agirê biçûk veguhere şewateke mezin. Dibe ku em hemû di nava wê şewatê de bişewitin. Divê herkes vê xetereyê bibîne.”
	
		&nbsp;


	&nbsp;