
Rojnamevan Ahmet Kanbal carek din ji heman nûçeyê xistin ber lêpirsînê 

2024-09-25 13:14:20


	&nbsp;

	MÊRDÎN - Rojnamevan Ahmet Kanbal ji ber nûçeya belav kiribû, doz hatibû vekirin û der barê wî de biryara “neşopandinê” hatibû dayîn. Ji heman nûçeyê bi îdiaya “agahiya xapîner bi zelalî belav kiriye” der barê Kanbal de lêpirsînek nû hat destpêkirin.&nbsp;

	&nbsp;

	Der barê nûçegihanê Ajansa Mezopotamya (MA) ê Mêrdînê Ahmet Kanbal de bi hinceta çêkirina nûçeyê û parvekirina li ser medya dîjîtal bi îdiaya “agahiya xapîner bi zelalî belav kiriye” lêpirsînek nû hat destpêkirin. Gelek nûçeyên Kanbal ku di navbera salên 2022’yan û 2023’yan de MA’yê weşandine û gelek parvekirinên wî yên li ser hesabê wî yê X (twitter) ji bo lêpirsînê wek hincet hatin nîşandan.&nbsp;

	&nbsp;

	HEMAN NÛÇE HINCET HAT NÎŞANDAN&nbsp;

	&nbsp;

	Her wiha nûçeyek ku berê der barê wê de biryara “neşopandinê” hat dayîn jî kirine hinceta lêpirsînê. Nûçeya endamê HPG’ê Mûsa Kahraman (Xebatkar Bagok) û xalê wî Lokman Gorgun ên li herêma Omeryan a Mêrdînê di şerekî de jiyana xwe ji dest dabûn jî kirine hinceta lêpirsînê.&nbsp;

	&nbsp;

	Berê ev nûçeya navborî kiribûn hincet û der barê Kanbal de bi îdiayên “endamê rêxistinê ye” û “propaganda rêxistinê kiriye” lêpirsîn hatibû destpêkirin. Dozgeriya Mêrdînê biryara “neşopandinê” dabû û paşê jî bi heman nûçeyê bi hinceta “agahiya xapîner bi zelalî belav kiriye” lêpirsîn hatibû destpêkirin. Dozgeriyê der barê lêpirsîna duyemîn de jî ku hatibû destpêkirin, biryara “neşopandinê” dabû.&nbsp;

	&nbsp;

	Midûriyeta polîsan di çarçoveya lêpirsîna nû de gazî Kanbal kir ku biçe îfade bide. Kanbal ji bo îfadeyê çû emniyetê û diyar kir ku ew îfadeya xwe ya berê dubare dike û parvekirinên wî bi naveroka nûçeyan bûne. Kanbal da zanîn ku di nûçeyên wî de agahiyên xapîner tune ne û armanca xala “agahiya xapîner bi zelalî belav kiriye” astengkirina rojnamevaniyê û rojnamevan e û sînordarkirina çêkirina nûçeyan e.&nbsp;

	&nbsp;

	Kanbal diyar kir ku rêxistinên pîşeyî yên rojnamevanan ji bo betalkirina xala navborî serlêdanan kirine û dozgerî jî ji bo betalkirina xala navborî ku li dijî Destûra Bingehîn e serlêdanî cihê pêwîst bike. Kanbal destnîşan kir ku ew tawanbariyê ku hatine kirin qebûl nake.&nbsp;

	&nbsp;