Li du bajaran hat xwestin ku girtiyên nexweş bên berdan 2024-11-09 16:04:35   STENBOL/ENQERE - Li Stenbolê û Enqereyê di çalakiyên ji bo girtiyên nexweş de hat xwestin girtiyê nexweş Dede Anil û Melek Akgun bên berdan.    Komîsyona Girtîgehan a Komeleya Mafên Mirovan (ÎHD) a Stenbolê di hefteya 659’emîn de çalakiya “Rûniştina F” li ber avahiya komeleyê ya li Beyoglûyê li dar xist. Di çalakiya vê hefteyê de hat xwestin girtiyê nexweş Dede Anil ê ji sedî 98 astengdar e û rewşa wî giran e ku li Girtîgeha Jimara 1’an a Tîpa L a Marmarayê tê ragirtin, bê berdan.    Nevzat Açan metna daxuyaniyê xwend û xwest Dede Anil ê ku gelek nexweşîn lê peyda bûne û rewşa wî giran bê berdan.    ENQERE    Înîsiyatîfa ji Girtiyên Nexweş re Azadî jî di hefteya 531’emîn de ji bo balê bikişîne ser rewşa girtiyên nexweş çaçakî li dar xist. Çalakî li Cadeya Sakaryayê pêk hat. Vê hefteyê balê kişandin ser rewşa girtiya nexweş Melek Akgun a li Girtîgeha Jinan a Kayseriyê tê ragirtin.    Rêvebera Navenda ÎHD’ê Nûray Çevîrmen daxuyanî xwend û xwest Melek Akgun û hemû girtiyên nexweş demildest bên berdan.