‘Divê pergala îşkenceyê ya Îmraliyê bi dawî bibe û birêz Ocalan azad bibe’ 

2024-12-09 11:44:03


	NAVENDA NÛÇEYAN - Parêzer û wasiyê Rêberê PKK’ê Abdullah Ocalan, Mazlum Dînç destnîşan kir ku miwekîlê wan di hevdîtina dawî de xwestiye parêzer biçin serdanê û got: “Divê pergala îşkenceyê ya Îmraliyê bi dawî bibe û birêz Ocalan azad bibe.”

	Tecrîda girankirî ya li ser Rêberê PKK’ê Abdullah Ocalan ku li Girtîgeha bi Ewlekariya Bilind a Îmraliyê tê ragirtin, didome. Parêzerê Buroya Hiqûqê ya Sedsalê û wasiyê Abdullah Ocalan, Mazlûm Dînç têkildarî qedexeya hevdîtina bi parêzer û malbatê re ji Ajansa Welat (AW) re axivî.

	 

	‘HEVDÎTINA DAWÎ NAYÊ WATEYA BIDAWÎBÛNA TECRÎDÊ’

	 

	Dînç anî ziman ku ev 26 sal in li Girava Îmraliyê, pergala tecrîdê di meriyetê de ye û wiha got: “26 sal in di bin tecrîdê û îşkenceyê de tê girtin. Her ku diçe tecrîda li ser birêz Abdullah Ocalan hatiye girankirin. Wan salên berê qet nebe hefteyê carek be jî hevdîtina parêzeran û ji mehê carek du car hevdîtina li gel malbatê pêk dihat. Lê piştî Tîrmeha 2011’an hevdîtina parêzeran bi temamî hatin qedexekirin. Di nava van 13 salan de sala 2019’an di encama grevên birçîbûnê de tenê pênc hevdîtinên îstîsna pêk hatin. Her wiha hevdîtinên malbatê jî sala 2015’an vir ve bi temamî hatine qedexekirin. Dîsa dem bi dem çend hevdîtinên îstîsna pêk hatin. Lê belê ev hevdîtinên ku pêk hatin nayê wê wateyê ku tecrîd bi temamî ji holê rabûye. Tecrîd hê jî li ser birêz Abdullah Ocalan û her sê girtiyên bi girankirî dewam dike. Berê hincetên ‘Keştî xerabe ye’ û ‘Rewşa hewayê nebaş e’ dihatin nîşandan, lê piştî Rewşa Awarte (OHAL) li Tirkiyeyê hat ragihandin rasterast biryar li ser Girava Îmraliyê hat girtin.”

	 

	‘26 SAL IN LI ÎMRALIYÊ HIQÛQ JI HOLÊ HATIYE RAKIRIN’

	 

	Bi domdarî Mazlûm Dînç bi lêv kir ku hiqûq bi temamî ji holê hatiye rakirin û ev tişt anî ziman: “Ev 26 sal in hiqûqa Tirkiyeyê li Îmraliyê nakeve dewrê. Êdî ew hincetên berê rakirin, vê carê biryarên dadgehê hincet hatin nîşandan. Ev biryar du salan hincet hatin nîşandan. Ew biryar ne biryarek hiqûqî ye. Tu nikare bi temamî hemû mafên girtiyekî ji destê wî bistînî. Tu nikarî hevdîtina parêzeran û malbatê bi temamî qedexe bikî. Her wiha mafên ragihandin ango danûstandina bi derve re, qedexe bikî. Hemû bi biryarekî hatibûn qedexekirin.

	 

	Piştre çi kirin? Dîtin ku ew biryara wan ne di cih de ye, vê carê ji serê her sê mehan carekê biryara ‘Cezayê disiplînê’ distînin. Hevdîtinê malbatê bi vê hincetê tên astengkirin. Û her serê şeş mehan carekê jî Dadgeha Înfazê ya Bursayê jî biryara qedexekirina parêzeran distîne. Bi vê hincetê jî hevdîtinên parêzeran tên qedexekirin. Lê ev biryar çi ne, wan biryaran nadin me. Li gorî hiqûqa Tirkiyeyê van biryaran jî ji me vedişêrin. Lê belê li gorî hiqûqa Tirkiyeyê nikarin biryaran ji parêzeran veşêrin.”

	 

	HAYA PARÊZERAN PIR DERENG JI BIRYARAN DIBE 

	 

	Mazlum Dînç destnîşan kir ku divê biryar bên teblîxkirin ku parêzer bikarin îtîrazê bikin û wiha dirêjî da axaftina xwe: “Em ji ber van biryaran serî li Dadgeha Mafên Mirovan a Ewropayê (DMME) didin. Hikûmeta Tirk, carna paşê, bi derengî wan biryaran dişînin DMME’yê. Ji wan agahiyan em hê nû pêdihesin, bi çi hincetê ev biryar hatine girtin. Dema em lê dinêrin, di wan biryaran de tu bingehek hiqûqî ya astengkirin û qedexekirina hevdîtina tune ye. Ji hincetan mînakek bidim; ji ber ku birêz Ocalan û her sê girtiyên din hefteyê sê roj û her rojê saetek derdikevin cihê hewadariyê û ‘volte diavêjin’ vê dikin hinceta cezayê disiplînê. Ev yek nayê qebûlkirin. Bi vê hincetê qedexekirina hevdîtina malbatê qet ne hiqûqî ye. CPT jî jixwe di raporên xwe de destnîşan kiribû; ev yek nayê qebûlkirin.”

	 

	Dînç da zanîn ku qanûnên Tirkiyeyê ku bi tevahî hevdîtinên parêzeran qedexe bikin tune ye û wiha axivî: “Her çiqas Dadgeha Înfazê ya Bûrsayê biryarek wiha dide jî ev biryar ne hiqûqî ye. Jixwe li dijî van biryaran serlêdanên me hene. Herî dawî meha Mijdarê biryara qedexekirina hevdîtin parêzeran ji bo şeş mehan hat standin. Wek biryarên din ev biryar jî bêhiqûqî ye.”

	 

	‘DIVÊ PERGALA ÎŞKENCEYÊ YA ÎMRALIYÊ BÊ HILWEŞANDIN’

	 

	Di berdewama axaftina xwe de Dînç destnîşan kir ku li tu devera dinyayê tu pêşengên ku ketine zindanan, ewqasî têkiliya wan bi derve re, bi gel re nehatine qutkirin û Abdullah Ocalan ji mafên xwe yên name, telefonan bêpar e. Dînç, pergala li Îmraliyê weke “pergala îşkenceyê” pênase kir û got: “Divê pergala îşkenceyê ya li Îmraliyê were hilweşandin.” 

	 

	‘DEMA AZADIYA BIRÊZ OCALAN HATIYE’

	 

	Parêzer Dînç bal kişand ser hevdîtina dawî ya Parlamenterê DEM Partiyê Omer Ocalan bi miwekîlê wan re kiriye û wiha domand: “Birêz Ocalan daxwaz û banga ‘Divê parêzer werin hevdîtina min’ kiriye.” Dînç, got ku êdî ji hêla hiqûqî ve dema azadiya Abdullah Ocalan hatiye û axaftina xwe wiha qedand: “Nabe ku ‘mafê hêviyê’ yê birêz Ocalan bi şertan ve bê girêdan. Êdî ev tiştekî hiqûqî ye û rewa ye ku divê ku birêz Ocalan azad bibe. Da ku dikaribe di çareserkirina pirsgirêka Kurd de bi rola xwe rabe.”