Qetilkirina rojnamegeran hate protestokirin: Bûn dengê Rojava 2024-12-22 15:16:03 NAVENDA NÛÇEYAN - Partiyên siyasî û rêxistinên civaka sivîl qetilkirina rojnameger Nazim Daştan û Cîhan Bîlgîn protesto kirin û gotin: “Nazim û Cîhan her tim bûn dengê heqîqet û Rojava.” Rojnameger Nazim Daştan û Cîhan Bîlgîn dema li Bakur û Rojhilatê Sûriyeyê geşedanên li herêmê dişopandin, di 19’ê Kanûnê de li ser rêya di navbera Bendava Tişrînê û bajarokê Sirînê de ji hêla dewleta tirk ve bi SÎHA’yê hatin qetilkirin. Bertekên li dijî qetilkirina rojnamegeran didomin. Li gelek bajaran çalakî hatin lidarxistin û komkujî hate şermezarkirin.    RIHA   Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî) û Tevgera Jinên Azad (TJA), li navçeya Wêranşar a Rihayê qetilkirina rojnamegeran protesto kirin.  Daxuyanî, li pêşiya rêxistina DEM Partiyê ya Wêranşarê hate dayin. Hevşaredar Bedriye Yorgun, endamên Meclisa Dayikên Aştiyê ya Rihayê û gelek kes tev li daxuyaniyê bûn. Di daxuyaniyê de wêneyên Cîhan Bîlgîn û Nazim Daştan û pankarta “Kes nikare Çapemeniya Azad bêdeng bike” hatin hilgirtin. Hevserokê DEM Partiyê yê Wêranşarê Ramazan Dîrîl diyar kir ku qetilkirina Cîhan Bîlgîn û Nazim Daştan, nîşaneya dijminatiya li hemberî gelê Kurd e.    Dîrîl, bi domdarî destnîşan kir ku rojnamegerên hatin qetilkirin di nava şert û mercên pir zehmet de ji bo ragihandina rastiyê têdikoşiyan û wiha got “: “Çapemeniya Azad ku di nava şert û mercên herî zehmet de li her çar aliyên cîhanê hewl dide rastiyan bi raya giştî re parve bike, kedeke mezin dide. Lewma jî gelek rojnameger hatin qetilkirin û girtin. Tevî van zextan û zilmê jî têkoşîna Çapemeniya Azad mezin bû û dê mezintir bibe. Nazim û Cîhan her tim bûn dengê heqîqet û Rojava.”    Daxuyanî, bi dirûşma “Kes nikare Çapemeniya Azad bêdeng bike” û bi çepikan bi dawî bû.    ÇEWLIG    DEM Partiyê li Çewligê jî daxuyanî da. Rêveberên partiyê yên bajar û navçeyan, rêveberên DBP’ê yên bajar û aktîvîstên TJA’yê tev li bûn. Di daxuyaniyê de pankarta bi nivîsa “Çapemeniya Azad nayê bêdengkirin” ku wêneyên rojnamegerên hatin qetilkirin li ser bû hate hilgirtin. Hevserokê DEM Partiyê yê Bajar Hasan Soysal, wiha got: “Qetilkirina Nazim Daştan û Cîhan Bîlgîn, encama hêrs û tirsa ji xebatên rojnamegeriyê ye. Li dijî heqîqetê şer dikin. Ev êriş, dikevin çarçoveya sûcê li dijî mirovahiyê û hiqûqa gerdûnî. Divê her kes li dijî van êrişan dengê xwe derxîne.”    Daxuyanî, bi dirûşma “Çapemeniya Azad bêdeng namîne” bi dawî bû.    WAN     Bi pêşengtiya DBP, DEM Partî û TJA’yê li Wanê çalakî hat lidarxistin. Nûnerên rêxistinên civaka sivîl û pîşeyî jî tev li bûn. Girse, li Taxa Karşiyakayê hate gel hev lê polîsan nehiştin meşa li vir were lidarxistin.    Koma ku ji hêla polîsan ve hate dorpêçkirin, çalakiya rûniştinê li dar xist. Di çalakiyê de gelek caran dirûşmên “Bijî berxwedana Rojava”, “Bijî berxwedana gelê Kurd”, “Rojava neket dê nekeve”, “Rojava rûmeta me ye” û “Çapemeniya Azad nayê bêdengkirin” hatin berzkirin.     Piştî demekî dirêj, beşdaran sirûd xwendin û çalakî bi dawî kirin.