Hilbijartiyên Bask û Katalan ji bo Abdullah Ocalan name ji Konseya Ewropayê re şandin 

2025-01-21 15:58:23


	 

	STENBOL - Senator û parlamenterên welatê Baskê û Katalonyayê ji bo çareseriya demokratîk a pirsgirêka Kurd û azadiya fîzîkî ya Abdullah Ocalan, ji Komîteya Wezîran a Konseya Ewropayê re name şandin. 

	 

	Canditat d'Unitat Popular - Defensem la Terra (Yekîtiya Gel - Em xaka xwe biparêzin) li Katalonyayê yek ji tevgerên herî çalak ên siyasî ye û li parlamentoyê koma xwe heye, EHBildu (Yekitiya ji bo welatê Baskê) ku li welatê Baskê yek ji tevgerên herî bi bandor ên siyasî ye, ji bo azadiya Abdullah Ocalan diyar kirin ku divê Konseya Ewropayê bikeve nava liv û tevgerê.

	 

	Name ji Serokê Komîteya Wezîran a Konseya Ewropayê Xavier Bettel û endamên komîteyê re hate nivîsandin û hate bibîrxistin ku di ser girtina Abdullah Ocalan re 26 sal derbas bûn û ji hingî ve li girtîgeha girava Îmraliyê ya Tirkiyeyê tê girtin.

	 

	Her wiha hate ragihandin ku serdana xizm û parêzerên wî li gorî kêfa siyasî ya hikumetên Tirk têne plankirin û biryara Dadgeha Mafên Mirovan a Ewropayê (DMME) ya li ser binpêkirina Peymana Mafên Mirovan a Ewropayê (PMME) ji aliyê Tirkiyeyê ve hate bibîrxistin ku “Mafê Hêviyê” ji holê rakiriye. Bi dewamî hate gotin, Komîteya Wezîran a Konseya Ewropayê zextê li Tirkiyeyê dike ku li gorî pîvanên PMME'yê gavên lezgîn biavêje.

	 

	Di dewama nameyê de kampanya “Ji bo Abdullah Ocalan azadî, ji bo pirsgirêka kurd çareseriya demokratîk” hate bibîrxist ku ji 10'ê Cotmeha 2023'an û vir ve li qada navneteweyî tê meşandin û hate destnîşankirin ku girîngiya siyasî ya Abdullah Ocalan a di şerê Tirk-Kurd de nikare ji nedîtî ve bê. Di nameyê de hate ragihandin ku artêşa Tirk bi êrişên li ser Bakurê Sûriyeyê û Bakurê Iraqê re şerê Tirk-Kurd derbasî derveyî sînorên Tirkiyeyê kiriye û hate gotin, çareseriya vî şerî wê aştiyê bîne Rojhilata Navîn.

	 

	'KOMÎTEYA WEZÎRAN BILA HELWESTEKE ÇALAK NÎŞAN BIDE'

	 

	Serdana Heyeta DEM Partiyê ya li Îmraliyê weke bûyereke erênî hate pênasekirin, lê hate gotin ku bêhiqûqiya li ser Abdullah Ocalan dewam dike û wiha hate gotin: “Rewşa heyî nîşan dide dide ku lîderiya Tirk û hikumeta wê çiqasî kêm ji aştiyê bawer dikin û gotina 'danûstandin tenê bi mirovekî azad dikare bê kirin' a Nelson Mandela rast e. Li gorî rewş û bûyera dawî dem hatiye ku Komîteya Wezîran ji bo çareseriya mayinde ya vê meseleyê helwesteke çalak nîşan bide. Birêz Ocalan li gel şert û mercên ne wekhev jî nîşan da ku ew alîgirê çareseriyeke aştiyane ye.

	 

	Divê destûr ji hevdîtina lîderê Kurd Abdullah Ocalan a bi parêzeran û malbatê re bê dayin û dawiya dawî jî ji bo karibe çareseriya siyasî, demokratîk û wekhev ji pirsgirêka Kurd re peyda bike, bê berdan. Ji bo berdana Birêz Ocalan wezîfeya Komîteya Wezîran e ku gavên şênber ên hiqûqî, dîplomatîk û siyasî biavêje."

	 

	Senator û parlamenterên Bask û Katalan ên mohra xwe danîne binê nameyê bi vî rengî ne:

	 

	* Pernando Barrena, Parlamenterê Yekîtiya Ewropayê

	 

	* Gorka Elejabarrieta, Senator, Serokê Koma Eh Bildu

	 

	* Josu Estarrona, Senator, Koma Eh Bildu

	 

	* Jon Iñarritu, Parlamenterê Koma Eh Bildu ya Meclîsa Nûneran

	 

	* Irati Jimenez, Parlamenterê Parlamenta Navarra ji Koma Eh Bildu

	 

	* Igor Zulaika, wekîlê Parlamenta Baskê ji koma Eh Bildu

	 

	* Diana Urrea, Wekîla Parlamenta Baskê ji Koma Eh Bildu

	 

	* Laia Estrada i Cañón, Wekîla Parlamenta Katalan, Seroka Koma GP CUP-DT

	 

	* Dani Cornellà Detrell, Wekîlê Parlamenta Katalan, Berdevkê GP CUP-DT

	 

	* Maria Pilar Castillejo Medina, Wekîla Parlamenta Katalan

	 

	* Laura Fernández Vega, Wekîla Parlamenta Katalan