Li Elkê wêneyê talanê: Daristanên Kespiyanişê di 3 mehan de hatin tunekirin 

2025-10-06 09:58:41


	ŞIRNEX - Derket holê ku daristanên gundê Kespiyanişê yê Elkê di nava 3 mehan de bi destê cerdevanan bi temamî hatine tunekirin. Wêneyên herêmê yên beriya birîna daran û piştî destpêkirina birîna daran, talana li herêmê radixin ber çavan. 

	 

	Derket holê ku daristanên gundê Kespiyanişê yê navçeya Elkê ya Şirnexê bi destê cerdevanan di nava 3 mehan de bi temamî hatine tunekirin. Piştî ku êdî darên bên birîn li herêmê neman, qirkirina li herêmê jî di meha Tebaxê de sekinî bû. Têkildarî qirkirina daran a li herêmê me di 7’ê Tebaxê de “Li Elkê Qirkirina daristanan: Xaka welat veguherandin çolistanê! " weşandibû. 

	 

	Di dîmenên gihiştin ber destê me de wêneyên beriya birîna daran û yên piştre, asta talana li herêmê radixin ber çavan. Quntarê çiyê ku di dîmenên demsala biharê de hatin kişandin de bi hezaran dar lê xuya dikin, di dîmenên piştî 3 mehan hatine kişandin de xuya nakin û nîşaneya asta qirkirina ekolojiyê ya li herêmê radixe ber çavan. 

	 

	Birîna daran a li Şirnex û navçeyên wê zêdetirî 5 sal in bênavber didome. 

	 

	MA / Emrullah Acar