Hesreta ji bo gorekê: Quncika Nazim û Cîhanê

2025-12-16 11:03:17


	MÊRDÎN - Malbata rojnamevan Cîhan Bîlgînê ku ligel hevpîşeyê xwe Nazim Daştan di êrişa Tirkiyeyê de jiyana xwe ji dest da, ji ber ku destûr nehat dayîn cenazeyên wan li bajarê wan bê definkirin, salek e bi quncikeke ku bi wêneyên keça xwe û Daştan xemilandiye, hesreta xwe ya ji bo gorê ditebitîne. 

	Rojnamevan Nazim Daştan û Cîhan Bîlgîn ku êrişên Artêşa Neteweyî ya Sûriyeyê (ANS) ya paramîlîter a bi piştgiriya Tirkiyeyê li ser Bendava Tişrîn û Qereqozakê li Bakur û Rojhilatê Sûriyeyê dişopandin, di 19'ê Kanûna 2024'an de rasterast ji aliyê droneke Tirk ve hatin hedefgirtin û kuştin. Daştan û Bîlgîn ku êrişên Heyet Tehrîr El Şam (HTŞ) û komên din ên ku bûn sedema guhertina rejîmê li welêt dişopandin, dema ku wesayîta wan a bi nîşana "çapemeniyê" hat bombekirin, hatin kuştin. Destûr nehat dayîn ku cenazeyên Cîhan Bîlgînê û Nazim Daştan li bajarên wan bên veşartin. Ji ber vê, her du hevpîşe li bajarê Qamîşloyê yê Bakur û Rojhilatê Sûriyeyê li kêleka hev hatin veşartin.

	 

	Cîhan Bîlgîn ku hat kuştin, di 27'ê Cotmeha 1995'an de li navçeya Midyadê ya Mêrdînê ji dayik bû. Cîhan Bîlgîn ku di sala 2014'an de Çapemeniya Azad nas kir, gavên xwe yên pêşîn di rojnamevaniyê de bi rêya belavkirinê avêt. Cîhan Bîlgînê dema ku rojnameyên Azadiya Welat û Ozgur Gundemê belav dikir, beşdarî çalakiyên nobedê yên li ser sînorê Kobanê li navçeya Pirsûs a Rihayê, li dijî êrişên dagirker ên DAIŞ'ê yên li ser Kobanê bû. Piştî ku demeke kurt li Dihaberê xebitî, di Kanûna 2017'an de koçî Bakur û Rojhilatê Sûriyeyê kir û li Ajansa Nûçeyan a Hawarê (ANHA) re ku li wir weşanê dike, dest bi xebatê kir. Cîhan Bîlgînê digel Nazim Daştan, heta kêliya dawî ya jiyana xwe kameraya xwe ber bi rastiya Bakur û Rojhilatê Sûriyeyê ve bir.

	 

	LÊGERÎNA LI HEQÎQETÊ

	 

	Cîhan Bîlgîn ku şoreşa Bakur û Rojhilatê Sûriyeyê ji nêz ve dişopand û hewl dida ku her kêliya şoreşê bi rêya nûçeyên xwe ji raya giştî re nîşan bide, di roja yekem a destpêkirina êrişan de bi Nazim Daştan re bala xwe da Minbicê. Piştî ku Meclisa Leşkerî ya Minbicê biryar da ku ji bajêr derkeve, Cîhan Bîlgîn ku ber bi Bendava Tişrînê ve çû ku şer lê dijwar bû, rojek beriya ku were kuştin, ji bo berxwedana Tişrînê peyamek da û got, "Pêvajoya dîrokî li benda me ye" û israra xwe ya li ser heqîqetê anî ziman.

	 

	QUNCIKA CÎHANÊ Û NAZIM

	 

	Malbata Cîhan Bîlgînê ji bo keça xwe û Nazim Daştan di mala xwe de quncikekî taybet çêkir. Ev quncik ku bi wêneyên bikulîk ên Cîhan û Nazim Daştan hatiye xemilandin, salek e qet nehatiye xerakirin. Gulên hişkkirî tim bi yên teze re tên guherandin. Malbat, hewl dide bi van wêneyan hesreta xwe ya ji bo gora keça xwe bitebitîne.

	 

	

	 

	Her çend destûr nayê dayîn ku cenazeyên wan li bajarên wan bên definkirin jî, nayê hiştin malbat biçin Qamişloyê ser gorên zarokên xwe. Lê tê payin ku malbat di salvegera koça Cîhan û Nazim de ku di nêz de ye, biçin Qamişloyê. 

	 

	Di salvegera mirina wê de, bavê Cîhan Bîlgînê Nesîm Bîlgîn, behsa keça xwe kir. Bîlgîn diyar kir ku keça wî ji xwendinê hez dikir û dixwest bi xwendina hiqûqê ji bo edaletê têbikoşe. Bîlgîn got: "Lêbelê, ew nikarîbû êriş û zilma DAIŞ'ê tehemûl bike. Wijdanê wê nikarîbû li wir bimîne. Ew pir dilovan bû. Ger perçeyek nan hebûya, ew ê bi hevalên xwe re parve bikira. Ew qas dilovan bû ku her gav di nav hevalên xwe de dihat hezkirin. Ew berî ku biçe jî wisa bû û ew piştî wê jî wisa bû. Heta îro jî, cîran û hevalên me hîn jî li ser wê diaxivin û serpêhatiyên li ser wê vedibêjin. Dema ku Cîhan tiştekî difikirî, ew dev jê bernedida heya ku negota 'Bes e.' Ew ê heta dawiyê bidomanda. Ew qas wêrek bû."

	 

	'GAVA ROJNAMEVANÎ DIKIRIN HATIN QETILKIRIN'

	 

	Bav Bîlgîn, bal kişand ser hêza hevgirtinê ku piştî kuştina Cîhan û Nazim derket holê û got ku ew ji vê yekê kêfxweş in û dixwazin ev yekîtî berdewam bike. Bîlgîn diyar kir ku yekîtî ji bo berdewamiya hebûnê girîng e û ji ber vê yekê divê her tim tifaq werin parastin û got: "Îro pêvajoyek heye. Em li benda aştîyê ne. Em naxwazin ku êşên nû ji her du aliyan ve çêbibin. Em hêvî dikin ku pêvajo berdewam bike û di çarçoveya rastî û heqîqetê de encamek derkeve holê. Ger ev pêvajo bi aştî biqede, ew ê ji bo tevahiya cîhanê bibe mînak. Ji ber vê yekê, em dixwazin ku ev pêvajo bi ser bikeve. Hem Nazim û hem jî Cîhan rojnamevan bûn. Ew li wir bêçek hatin kuştin. Dema ku rojnamevaniyê dikirin hatin kuştin."

	 

	Bav Bîlgîn diyar kir ku wan ji destpêkê ve xwestiye ku berpirsên mirina Cîhan û Nazim werin eşkerekirin û darizandin, lê îro ew amade ne ku ji bo aştiyê dev ji her tiştî berdin. Bîlgîn got: "Ger aştî hebe, em amade ne ku dev ji her tiştî berdin. Lê ger aştî nebe, divê ev daxwaza me were bicîhanîn. Aştî ji bo me ji her tiştî girîngtir e. Dema ku aştî were, ger ew destên xwe dirêj bikin, em ê bi wan bigirin. Pêwîst e her kes piştgiriyê bide vê pêvajoyê, li cem hev bisekine û pêvajoyê xurt bike. Divê dewlet jî rola xwe bilîze. Armanca Cîhan û Nazim ew bû ku tiştên baş biqewimin. Dema ku em bi Cîhan re bi telefonê axivîn, wê got ku ew li bendê ne ku şer raweste û aştî were avakirin. Ev gotinên wê bi xwe bûn. Bi hêvî me ku daxwazên wan werin bicîhanîn. Daxwaza me ew e ku daxwazên wan demildest bên bicîhanîn."

	 

	MA / Ahmet Kanbal