Karesata erdhejê li ser 10 bajaran bandorek neyînî hişt. Bi deh hezaran mirov di bin xirbeyên erdhejê de jiyana xwe ji dest dan û bi sed hezaran mirov birîndar bûn. Rewşa bi hezaran welatî xedar e. Hê jî agahî ji gelek mirovên di bin xirbeyan de nayê girtin. Gelek bajêr û navçey dem û duz bûne û birînên mezin li pey xwe hişt. Erdhejê bandor li ser bi milyonan mirov kir û bi sed hezaran mirov ji bo tevdîra canê xwe neçar man mal û avahiyên xwe terk bikin. Bi sedhezaran mirov bi sir û seqema zivistanê ya dijwar re rûbirû man û mexdûr bûn. 

 

Pisporên xizmeta civakî ku balê dikişînin ser bandora erdhejê ya li ser civakê diyar dikin ku pêşniyaz dikin ku divê piştevaniya psîkososyal û xizmeta civakî ji mexdûran re bê kirin. 

 

DESTEKA PSÎKOSOSYAL 

 

Rêvebera Komeleya Pisporên Xizmeta Civakî (SHUDER) a Şaxa Amedê Bahriye Eşme diyar kir ku wan di bin banê Platforma Parastina Bajêr û Piştevaniya Amedê de xebatên xizmeta civakî bi rê ve dibin û divê piştî travmaya karesata çêbû xebata desteka psîkososyal ji bo welatiyan bê destpêkirin. 

 

TRAVMA ZÊDE BÛYE 

 

Hevserokê Sendîkaya Kedkarên Tenduristî û Xizmeta Civakî (SES) a Şaxa Amedê derûnnas Şiyar Guldîken jî behsa travmayên qewimîne kir û dibe ku di warê travmayê de bertekên civakî zêde bin. Guldîken anî ziman ku erdhejê bandorek neyînî li ser zarokan kiriye û divê ku beriya her tiştî zarok ji tirsê bên parastin. Guldîken destnîşan kir ku divê xizmeta psîkososyal, civakî û fizîkî ji bo mexdûrên erdhejê bê dayîn û ev destek bênavber bidome. 

 

DERÛNNASÊN DILXWAZ BO PIŞTEVANIYÊ AMADE NE

 

Derûnnas Rûken Esen û Bêrîtan Guneş ên endamên Înîsiyatîfa Derûnnasên Mezopotamya wek dilxwaz ji xebatên erdhejê de cih digirin dan zanîn ku felaketek mezin çêbûye û rê li ber travmayên nû vekir. Derûnnasan got mirin ne qeder e û ew amade ne ku desteka psîkososyal bidin civakê û dê xebatên wan bênavber berdewam bikin. 

 

MA / Zerrîn Sargut