NAVENDA NÛÇEYAN - Rêberê PKK’ê Abdullah Ocalan diyar kir ku AKP ji bo tesfiyekirina gelê kurd di nava hewldana pêşxistina rêbazên nû de ye û wiha balê dikişîne ser hêzên kûr ên li pişt Hîzbûllahê û planên wan û wiha got: “AKP hewl dide Hamasa kurd ava bike.”  

 

Hilbijartinên serokkomarî û giştî bi xwe re tifaqên cuda anîn. AKP û MHP’ê ku siyaseta xwe li ser bingeha dijminatiya kurd ava kir, bi partiyên weke Partiya Doza Azad, Partiya Yenîden Refahê û Partiya Yekitiya Mezin (BBP) Tifaqa Cumhur ava kir. Bi vê yekê hem peyama domandina şerê li dijî kurdan da û di qadên hilbijartinê de jî bi daxuyaniyên xwe ev yek piştrast kir. 

 

Wezîrê Karên Hundir ê berê Suleyman Soylu ku AKP’ê di sala 2016’an de kiribû wezîr û ji wê rojê heta niha bi dijminatiya xwe ya li dijî kurdan tê naskirin û niha jî weke Parlamenterê AKP’ê yê Stenbolê hate hilbijartin, di tûra duyemîn a hilbijartina serokkomariyê de şîfreyên vê tifaqê eşkere kir. 

 

Soylu, tifaqa AKP’ê ya bi Partiya Doza Azad re weke “aqilê dewletê” pênase kir û bi gotina “Heke me HUDA PAR ji bo wî alî bihişta, dê me çi bikira” re diyar kir ku gavekî stratejîk avêtine. 

 

Di civîna Lijneya Ewlekariya Neteweyî (MGK) a di 30’ê cotmeha 2014’an de biryara “Plana Têkbirinê” hate dayîn û AKP’ê di 24’ê tîrmeha 2015’an de dest bi plana tesfiyekirina kurdan kir. Lê piştî ku encama dixwest bi dest nexist, serî li rêbazên cuda da. AKP’ê îşaretên vê jî bi tifaqên di bin navê hilbijartinê de ava kirî re da. Lewma bicihgirtina Partiya Doza Azad a di nava Tifaqa Cumhur de, careke din Hîzbûllah xist rojeva raya giştî ku di salên 1990’î de bi qetilkirina kurdan tê naskirin. 

 

Rêberê PKK’ê Abdullah Ocalan li Girtîgeha Tîpa F a bi Ewlekariya Bilind a Îmraliyê di bin şert û mercên giran ên tecrîdê de tê ragirtin. Abdullah Ocalan, di hevdîtineke xwe yê berê de bi gotina “AKP hewl dide Hamasa kurd ava bike” hişyariyê dide û balê dikişîne ser plana AKP’ê ya tesfiyekirina kurdan.  

 

‘ÎSLAMA SIYASÎ BI AKP’Ê DIDOME’

 

Abdullah Ocalan dibêje ku Îslama Siyasî ji destpêka damezirandina komarê heta niha bi partiyan re di nava peywendiyan de ye û di demên berê de bi Partiya Demokrat û Partiya Selametê û niha jî bi AKP’ê re didomîne. Abdullah Ocalan, bi domdarî dibêje ku baskekî Îslama Siyasî li ser Sûriyeyê xwe digihîne Erebistana Siûdî û alîkariya aborî digire. Abdullah Ocalan, destnîşan dike ku Hîzbûllaha ku bi hezaran kurd qetil kirî jî parçeyeke van e. Di hevdîtina 13’ê îlona 2007’an a bi parêzeran re de Ocalan dibêje ku di vê ev yek baş bi gel re were vegotin û wiha didomîne: “Divê ew wehşeta hatiye jiyîn neyê jibîrkirin. Ev kes li Amedê ji pişt ve nêzî mirovan dibûn, bi biviran dikuştin. An jî ji pişt ve guleyek li serê xelkê didan û dikuştin. Gelo ma ne ev bûn ên bi vî awayî bi hezaran kurdên welatparêz ên hejar kuştin? Heke bihêlin dê me tevan bi hovane qetil bikin. Ji ewil Bahriye Uçok, Ugur Mumcu û kemalîstên çepgir qetil kirin. Piştre jî - ku naxwazim tevahiya dewletê di bin gumanê de bihêlim – bi destê hinek walî û fermandarên garnîzonan bi taybet jî di sala 92’yan de weke hîzbûl-kontra li dijî kurdan hatin bikaranîn. Weke mînak, ya ku Waliyê Êlihê kirî ev bû. Dadgeha Amedê bi salan piştre di biryareke xwe de dibêje bê ka ev rêbaz çiqasî şaş bû. Heta ku dadgehê jî dibêje ev yek nayê qebûlkirin. Divê gelê me li dijî van talûkeyan hişyar be.” 

 

‘DEWLETÊ ÇAVÊN XWE LI HÎZBÛLLAHÊ GIRT’

 

Di hevdîtina 19’ê îlona 2007’an de Abdullah Ocalan dibêje ku Hîzbûllah rêxistineke xeternake, divê gel li dijî wê baş were têgihandin û wiha didomîne: “Di demên berê de weke Hîzbûl-kontrayê şandin ser me. Bi hezaran welatparêz qetil kirin. Dewletê jî çavên xwe li vê girt. Lê êdî dadgeh jî dibêjin ku ev yek helwestekî xelete. Dibêjin me bi bikaranîna Hîzbûllahê re xeletî kir. Lê niha tu ferqa vê ekîba niha ji Hîzbûl-kontrayê nîne. Armanc, tesfiye kirine. AKP hewl dide Hamasa kurd ava bike. Wisa vala vala bang li Hamasê nekirin û pê re hevdîtin nekirin. Çawa ku Hamasê FKO (Rêxistina Rizgariya Filistînê) tesfiye kir, dixwazin heman aqûbetê bi serê PKK’ê bînin.” 

 

DI SALÊN 90’Î DE KOMKUJIYA KURDAN

 

Di hevdîtina 26’ê îlona 2007’an de jî Abdullah Ocalan hişyariya avakirina Hamasa kurd dike û wiha dibêje: “Deh sal berê kesekî texmîn nedikir ku dê FKO û Hamas ji hev veqetin û li dijî hev şer bikin. Tu kesî texmîn nedikir ku dê Hîzbûllah di salên 1990’î de were avakirin û bi hezaran kurdan pê bidin kuştin. Lê FKO û Hamas niha şer dikin. Hîzbûllahê jî bi hezaran mirovên me qetil kir. Di nava kolanan de bi satoran xelkê me yê welatparêz qetil kirin.” 

 

Abdullah Ocalan di hevdîtina 27’ê kanûna 2007’an de dibêje ku dê hewl bidin valahiya piştî tesfiyekirina PKK’ê li herêmê çêdibe bi Hamasa Kurd re tije bikin û wiha didomîne: “Ev yek dê bi destê AKP’ê were kirin. Lê ev yek bêçaresertî ye. Siyaseta herî maqûl a çareseriyê, siyaseta me ye.” 

 

‘DIVÊ HEMÛ HÊZ BÊN SEFERBERKIRIN’

 

Abdullah Ocalan, di hevdîtina 9’ê çileya 2008’an de diyar dike ku Hîzbûllahê ji ewil xwe di bin banê Cemiyeta Îlîmê de birêxistin kiriye û wiha pê de diçe: “Piştre bû du beş. Ji ewil deh kes bûn, piştre bûn sed kes, bûn hezar kes û xelkê Amedê bi satoran birîn. Niha hejmara wan zêdetire û xeteretir in. Ji ewil piştgirî dan Velîoglû, bi kar anîn û rewşa piştre jî tê zanîn. Dikarin hemû hêzên Amedê seferber bikin û xebatekî baş bikin. Divê kesên li ser navê Amedê siyasetê dikin vê yekê baş vebêjin.” 

 

‘DIVÊ GEL XWE PIR BAŞ BIRÊXISTIN BIKE’

 

Di hevdîtina 9’ê îlona 2009’an de Abdullah Ocalan dibêje ku Hîzbûllah li herêmê dîsa ketiye nava liv û tevgerê û wiha dibêje: “Dibe ku ev dîsa bikevin nava tevgerê û dest bi cînayetan bikin. Weke ku hûn jî dizanin di salên 90’î de Farqîn serûbin kirin. Ev faşîst in, kujer in. Wisa ji pişt ve qetil dikin û haya we jê çênabe. Divê gelê me li dijî van hişyar be û xwe pir baş birêxistin bike.” 

 

ÎKTÎDARA EL FETÎHÊ BI BÎR XIST

 

Rêberê PKK’ê Abdullah Ocalan di hevdîtina 1’ê mijdara 2010’an de jî dibêje ku hinek rêxistinbûnên li herêmê aliyê Hîzbûllahê yên nebiçek in û vê nirxandinê dike: “Ev yek pir cidî ye, Hîzbûllah bêçek ava dikin. Bi demê re ji bo ola îslamê ji bo armancên xwe bi kar bînin, dibe ku veguherin karektereke pir xetere. AKP hewl dide Hamasa xwe ava bike. Di rewşeke wiha de dê we bixeniqînin. Dibe ku birêz serokwezîr di ferqa vê talûkeyê de nebe, di ferqa micidbûna rewşê de nebe lê heke ev rêxistinên mîna Hamasê herêmê bi dest bixin, êdî ew jî nikarin kontrol bikin. Ev kes ne tenê dê hewl bidin me tesfiye bikin lê dibe ku tevahiya herêmê bixin bin kontrola xwe. Li Filistînê wiha kirin. Desthilatdarî çawa ji El Fetîhê standin? Ma we nedît bê ka vê zîhniyeta Hamasê li Filistînê çi kir? Di dema bidestxistina desthilatdariyê de mirov ji ser serê bînayan avêtin xwarê. Dixwazin heman tiştî li herêmê jî dubare bikin. Tu eleqeya van bi olê re nîne. Hewl didin îslameke wiha sexte re bikin.” 

 

'ARMANCA ESASÎ YA AKP’Ê TESFIYE YE’

 

Abdullah Ocalan dibêje ku Hîzbûllah parçeyeke pir biçûk a “Hêzên kûr e” û bal kişand ser hêzên kûr ên li pişt wê û planên wan. Di hevdîtina 2’yê sibata 2011’an de Rêberê PKK’ê Abdullah Ocalan vê nirxandinê dike: “Armanca esasî ya AKP’ê tesfiyekirine. Ev yek pir zelal û eşkere ye. Heta niha jî nekarin kurdan bi rêbazên klasîk kurdan tesfiye bikin. Niha jî serî li rêbazên cuda didin. Ev polîtîkaye, polîtîkayên qirkirinê yên nû ne. Vaye beşekê artêşê şer naxwaze, ji şer êdî bêzar bûne, giran û tiral bûne. Lewma nikarin şerê dixwazin bi van bidin kirin. Lewma hêzeke taybet a girêdayî xwe ya ji 50 hezar kesan pêk tê ya bitevger ava kir. Dê milyarek û nîv û du milyar pereyan bide her yek ji wan. Her wiha artêşeke melayan a ji 15 hezaran kesan pêk tê şandiye herêmê. Lê ev ne melayên klasîk in. Ev kes bi taybet hatine peywirdarkirin. Bawerim qereqolên nû tên avakirin.  Ma artêşa bipereyan ava nekir, ma melayên bi peywira taybet nehatin tayînkirin, ma bi tehliyekirina Hîzbûllahê re hêzên cîgir ava nekir? Tesfiyekirina kurdan bi rêbazên cuda tê meşandin.” 

 

Rêberê PKK’ê Abdullah Ocalan di hevdîtina 18’ê sibatê de jî diyar dike ku AKP hewl dide hegemonyaya xwe ava bike û divê hemû kes li dijî vê bikeve nava liv û tevgerê.