HDK ji Lijneya Giştî re amade ye: Avakirina jinûve û rêxistinbûyîneke xurt 

2024-10-29 10:51:02


	 

	STENBOL - Hevberdevka HDK’ê Esengul Demîr da xuyakirin ku HDK li ser bingeha avakirina jinûve û rêxistinbûyîneke xurt xwe ji bo serdema nû amade dike û got: “Di serdema nû de em HDK’yeke xurt, rêxistinbûyî û hin bêhtir bipratîk hedef dikin.”

	 

	Kongreya Demokratîk a Gelan (HDK) ku nasname, bawerî û çandên cuda di nava xwe de dihewîne, ji 15’ê cotmeha 2011’an ku hatiye avakirin ve xebatên xwe didomîne. HDK dê di vê çarçoveyê de di 3’yê mijdarê de bi dirûşma “Bihêvî, biberxwedan, bi hev re ber bi azadiyê ve” dê 13’emîn Lijneya Giştî li dar bixe. Lijneya Giştî ku amadekariyên wê di asta qedandinê de ne dê li Navenda Çand û Hunerê ya Dr. Kadîr Topbaş a li navçeya Sancaktepe ya Stenbolê pêk were. 

	 

	HDK ku ji roja avabûye û vir ve bi tora rêxistinbûyînê ya bi rêya meclisan li gelek qadan dixebite, wê bi Lijneya Giştî bi pêkhate û meclisên xurttir bikeve serdema nû. Li ser vê bingehê di serdema nû ya HDK’ê de wê Meclisa Edaletê û pêkhateyên nû ku karkerên motokurye, kaxiz û înşaetê jî di nav de cih digirin dê hebin. 

	 

	Hevberdevka HDK’ê Esengul Demîr têkildarî amadekariyên lijneya giştî nirxandin kirin. 

	 

	WEKE LIHEVKIRINA BINDESTAN HDK

	 

	Demîr, bi bîr xist ku HDK’ê di serî de çareseriya pirsgirêka kurd a di bingeheke demokratîk li ser têkoşîna wekhevî û mafên bindestan li Tirkiyeyê xwe ragihandiye û da zanîn ku HDK li dijî pergalê di bin banekê de weke lihevkirina bindestan hate avakirin. 

	 

	DIYALEKTÎKA KONGRE-PARTIYÊ

	 

	Demîr, diyar kir ku HDK Û HDP (DEM Partî) weke encama fikriyata partî û kongreyê derketin holê lê ev diyalektîk dê bi Lijneya Giştî dîsa bigirin dest û wiha got: “Piştî avakirina HDK’ê salekê weke partiya kongreyê HDP hate avakirin û biryar hate girtin û bi wê partiyê bikevin hilbijartinê. Li pişt re ji ber temsiliyeta partiyê ya li Meclisê cih cih rewşeke ku têkiliya di navbera partî û kongreyê de nehate fêmkirin derket holê. Ji ber vê yekê yek ji nîqaşên me yên vê serdemê ew e ku li ser pêkanîna diyalektîka kongreya partiyê bixebitin. Ji ber ku têkilî qut bûne, risk heye ku partî ji hegemonya îdeolojîk dûr bikeve. Ji ber ku HDK ne saziyeke sivîl a civakî ye, avaniyeke ku perspektîfa wê ya polîtîk û hedefên wê heye ye. Di serdema nû de ji bo ev fikriyat di bin banê partiyê de zindî bibe dê hewldanek û kedeke me ya zêde hebe.”

	 

	BERBI PÊVAJOYA AVAKIRINA NÛ VE

	 

	Demîr, bi bîr xist ku avakirina HDK’ê li ser dirûşma “Rêwîtiya ber bi hêviyê ve” esas girtine û bi lêv kir ku dê di 13’emîn Lijneya Giştî  de balê bikişînin ser vê dirûşmê. Demîr, îşaret kir ku bi vê yekê bi lijneyê re dê bikevin pêvajoya avakirina nû û wiha dirêjî da axaftin axwe: “Em 13’emîn Lijneya Giştî weke pêvajoya avakirinekê difikirin û me xwe li gorî vê amade kir. Me di serdema nû de sewirand ku bila di damezrandina HDK’ê re têkildar be, xwe bigihînin girseyên mezin û bi perspektîfeke nû wan birêxistin bikin. Ji ber vê yekê me pêvajoyên amadekirina kongreyê bi nîqaşên tund bi hemû pêkhateyên xwe re derbas kir. Me nîqaşên polîtîk û îdeolojîk, xwenirxandin, nirxandina pêkhateyên kongreyê û her wiha bi awayekî rexneyî li ser kêmasiyên xwe û çawaniya amadekirina serdema nû nîqaş kir.”

	 

	‘DIVÊ JI BO TÊKOŞÎNA HEVPAR EM WERIN CEMHEV’ 

	 

	Demîr, diyar kir ku beriya lijneyê ji bilî pêkhateyên heyî yên HDK’ê bi beşên cuda re hatine bahev û da zanîn ku di encama hevdîtinên hatin kirin de di çarçoveya pêvajoya avakirina jinûve de pêkhateyên nû tev li HDK’ê bûn. Demîrê, axaftina xwe wiha domand: “Ji bilî pêkhateyên HDK’ê em bi qadên têkoşînê yên civakî re hatin bahev. Me bi wan re nîqaş kirin. Ev karkerên ku kaxizan kom dikin, motokurye bûn. Ev kom gelek berfireh in û pirsgirêkên gelek cidî dijîn. Di heman demê de bi karkerên înşaetê û kedkarên hin karên cuda de dixebitin re hatin bahev. Me li eniya jinê jî nîqaşên cuda kirin. Em armanc dikin ku bi van avanihayn re têkiliyê deynin û ji bo têkoşîna hevpar dîsa werin bahev.”

	 

	MECLISÊN NÛ 

	 

	Demîr, bal kişand ku ji bilî Meclisên ku di nava HDK’ê de cih digirin ligel lijneyê dê Meclisa Edaletê jî tev li HDK’ê bikin û ev tişt got: “Meclisên HDK’ê yên weke Meclisa Jinan, Meclisa Ciwanan hene. Ji bilî wan Meclisa Bawerî û Gelan, Koç û Penaberiyê, Meclisa Kedê, Meclisa Çand û Hunerê hene. Em ê di serdema nû de Meclisa Plansazên Bajêr a Endezar û Avahîsazan hinek din aktîf bikin. Me armanc kir ku ji bilî van Meclisan Meclisa Edaletê ava bikin. Ji ber ku li welat nîqaşên dadgeha destûra bingehîn a nû tên kirin. Ji bilî wan binpêkirinên mafan ên cidî û bêhiqûqî hene.”

	 

	‘EM HDK’YEKE BIPRATÎK ARMANC DIKIN’ 

	 

	Demîr herî dawî ev tişt gotin: “Di civakê de nerazîbûnên cidî, dînamîkên cuda yên têkoşînê hene. Rastiya ku hemû di qenalên cuda de vê têkoşînê dimeşînin, rewşeke ku desthilatdariyê qels dike ye. Di serdema nû de em HDK’yeke xurt, rêxistinbûyî û hin bêhtir bipratîk hedef dikin.”

	 

	MA/ Îbrahîm Irmak