MÊRDÎN - Li Avaspî ya li Nisêbînê lehî rabûbû û cafe û dikan di bin lehiyê de mabûn. Dikandar niha hewl didin alavên xwe xelas bikin.

 

Di 12-13’ê nîsanê de li Avaspî ya li navçeya Nisêbîna Mêrdînê ku wek cihê turîzmê û qada seyranê tê zanîn di bin lehiyê de mabû. Dikan û cafeyên dikandaran ku di bin avê de mabûn, xesarek mezin dîtin. Piştî vekişîna avê alavên dikandaran di bin ritamê de mane û nayên bikaranîn. Tevî ku çend roj bi ser lehiyê re derbas bûye jî ritam nehatiye paqijkirin û dikandar li ser ber dikanên xwe sekinîne û hewl didin tiştên xwe xelas bikin. 

 

Dikandaran da zanîn ku rayedaran li halê wan nepirsiye û xebata paqijkirinê nekirine û xemsar nêzî wan bûne. Dikandaran got ekîbên şaredariyê bêkêr mane û ew bi tenê hatine hiştin. 

 

Dikandaran anî ziman ku ji navçeya Midyadê li şûna ekîbên paqijiyê, cerdevan hatine şandin û Şaredariya Nisêbînê jî ekîban kêm şandiye û gotin: “Xesarek me ya mezin çêbûye.” 

 

Dikandaran dan zanîn ku wê sezona turîzmê dest pê bike û divê ew bi lez dest bi kare xwe bikin û xwestin tişta dikeve ser milê rayedaran bikin.