STENBOL - Bi hinceta ku dermanê di bin kontrola gardiyanan de bi kar tîne neda, êrişî girtî Erhan Bayir hate kirin û di hevdîtina bi malbatê re de gef lê hatin xwarin. 

 

Erhan Bayir nêzî sê sal berê li Stenbolê ji ber bûyereke edlî hate girtin û ev 2 sal in girtî ye. Bayir, nexweşê epîlepsiyê ye û ji ewil birin Girtîgeha Maltepeyê. Bayir, ji wir sewqî Girtîgeha Hejmar 1 a Tîpa T a Bandirma ya Balikesîrê. Ji ber ku roman e û dermanên xwe yên ji bo tedawiya epîlepsiyê neda girtiyên din ên edlî, gelek caran rastî êrişê hat. Bayir, di hevdîtina bi telefonê ya bidîmen de ji malbata xwe re got ku careke din rastî êrişê hatiye. Di dîmen de xuya dike ku serê Bayir bi temamî bi bandajê hatiye pêçandin, binçavên wî reş û şîn bûne, lêva wî jî teqiyaye. Bayir, di hevdîtinê de got ku ji ber ku roman e rastî nêzikatiyên cihêkar û êrişî girtiyên din tê. 

 

Kekê Erhan Bayir, Resûl Bayir diyar kir ku birayê wî 8 meh in li Girtîgeha Hejmar 1 a Tîpa T a Bandirmayê tê ragirtin û wiha got: “Girtiyên din gefan lê dixwin, heqaret, çêr û îşkenceyê lê dikin. Birayê min di bin kontrola gardiyanan de dermanê epîlepsiyê bi kar tîne. Ji ber ku mîna tiryakê ye, girtiyên din jê dixwazin. Birayê min jî nade lewma tê derbkirin. Sedema van êrişan jî birayê min nexweşê epîlepsiyê ye. Birayê min di bin çavdêriya gardiyanan de vî dermanî bi kar tîne. Gardiyan nava devê wî kontrol dikin û kontrol dikin ka vedixwe an na. 15 deqeyan piştre dîsa dibin qawîşa wî. Dema gardiyan diçin jî girtiyên din bi darê zorê birayê min didin verişandin û heba xwarî ji mîdeyê wî derdixînin û vedixwin. Birayê min got ku girtiyên din jê re dibêjin; ‘Dê dermanî venexwî û ji me re bînî, nexwe em ê te bikujin.’ Gefan lê dixwin û çêran lê dikin.”

 

'MIN JI VIR XELAS BIKIN’

 

Resûl Bayir wiha qala hevdîtina dawî ya rû bi rû bi birayê xwe re kir: “Ez, dayika min û zarokên birayê min çûn hevdîtina rû bi rû. Li wê eywana ewqas mezin 2 gardiyanan birayê min anîn. Min ji birayê xwe re got; ‘Çima em tenê li vir in, xizmên hevalên din tune ne?’ Birayê min li erdê dinihêrt û li rûyê me mêze nedikir. Giriya û li gardiyanan nihêrt û got; ‘Kekê min ji vir xelas bikin.’ Piştre jî ser hişê xwe çû. Piştre jî birin û hevdîtin bi dawî bû. Me rewş ji parêzerê xwe re parve kir. Piştre birayê min birin qawîşa nexweşan. Li wir jî wêneyên wî he.e Bi kêran êrişî qirik, guh û serê birayê min kirine. Dev û pozê wî werimî ne û serê wî pêçayî ye.” 

 

'EM Ê TEVÎ SAZIYAN BIÇIN GIRTÎGEHÊ’ 

 

Parêzera Bayir, Zozan Vargun gotinên Resûl Bayir piştrast kir û da zanîn ku di demên berê de jî êrişên mîna vê hatine kirin. Zozan Vargun, got ku wan serî li îdareya girtîgehê dane û wiha domand: “Em ê serî li CÎSST, ÎHD û saziyên din bidin. Em ê tevî van saziyan biçin girtîgehê. Em ê jê re bibêjin ku îdare bi girtiyên din re biaxive û di dema hejmartinê de gardiyan bi girtiyan re hevdîtinê bikin û wan hişyar bikin. Di vê mijarê de ji bo îdareya girtîgehê tişta dikeve ser milê xwe pêk bîne, wan bidin zorê. Piştî van tiştên qewimîn, qawîşa Erhan Bayir hate guherandin. Her wiha em ê bixwazin ku Bayir were sewqkirin. Têkildarî mijarê me bi CÎSST’ê re peywendî danîn û CÎSST’ê ji bo Bayir serî li Wezareta Dadê û Midûriyeta Giştî ya Girtîgehan da.” 

 

DI SERLÊDANÊ DE BAL KIŞAND SER MAFÊ TENDURISTIYÊ 

 

Di serlêdanê de hat destnîşankirin ku Bayir di mijara xwegihandina dermanê nexweşiya xwe de pirsgirêkan dijî, ev yek rê li ber astengkirina tedawiya wî digire û ji Wezareta Dadê û saziyên têkildar hat xwestin ku berpirsyartiya xwe bi cih bînin. 

 

Bi domdarî biryara AYM’ê ya di 18’ê mijdara 2015’an de ji bo girtiyê nexweş Mete Dursun dayî hat bibîrxistin û hat xwestin ku Bayir were sewqkirin. Hat gotin ku cîbicîkirina tedawiya pêwîst a Bayir dikeve çarçoveya mafê jiyanê û îdareya girtîgehê jê berpirsyar e ku vî mafî bi cih bîne. Serlêdan wiha bi dawî bû: “Lê belê girtî dibêje ku ji bo wî şertên guncav ên tedawiyê nehatine afirandin. Li gorî îçtîhadên AYM’ê ev yek binpêkirina qedexeya îşkence û muameleya xerab e. Em dixwazin pirsgirêkên Erhan Bayir di mijara xwegihandina tenduristiyê de dijî bên çareserkirin û komeleya me di mijara hewldanên we de bê agahdarkirin.” 

 

MA / Omer Îbrahîmoglû