RIHA - Li ser sînorê Kobanê-Pirsûsê çalakiya nobetê hate destpêkirin. Di çalakiyê de bertek nîşanî qetilkirina rojnameger Nazim Daştan û Cîhan Bîlgîn jî hate dayin.
Li dijî êrişên dewleta tirk û koma wê ya paramîlîter SMO’yê yên li dijî Bakur û Rojhilatê Sûriyeyê, bi pêşengtiya Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî) û Tevgera Jinên Azad (TJA) li sînorê navçeya Pirsûsê ya Rihayê û Kobanê çalakiya nobetê hate destpêkirin. Parlamenterên DEM Partiyê, endamên Meclisa Dayikên Aştiyê ya Rihayê, pêkhateyên Platforma Ked û Demokrasiyê ya Rihayê û gelek kes tev li bûn.
Tevî hewldanên astengkirinê yên polîsan jî bi sedan kes li ser rêya Kobanê-Pirsûsê hatin gel hev û beriya nobetê daxuyanî dan. Di daxuyaniyê de pankartên "Rojava rûmeta me ye" û “Çapemeniya Azad nayê bêdengkirin hatin hilgirtin.” Girseyê her wiha dovîza “Em bi hev re bi ser ketin dê bi hev re biparêzin” hilgirt.
‘DIVÊ TECRÎD BI DAWÎ BIBE’
Hevserokê DBP’a Amedê Şîrîn Gurbuz di daxuyaniyê de wiha got: “Êrişên li dijî Kobanê di heman demê de li dijî vê derê tên kirin. Em bangî hemû kesî dikin; em bibin yek, PDK jî di nav de. Li ser sînorê Kobanê em dibêjin êdî bes e. Em, berxwedana Kobanê silav dikin. Bijî berxedana Kobanê. Ev sal dê bibe sala azadiya Abdullah Ocalan. Deriyên Îmraliyê vekin. Heke çareserî bibe, ev yek dê bi saya felsefeya birêz Ocalan bibe. Em tecrîdê şermezar dikin. Çareserî bi muxataban dibe, birêz Ocalan jî muxatab e. Divê tecrîd tavilê bi dawî bibe.” Piştre jî Hevseroka DEM Partiyê ya Dîlokê Zozan Ayhan axivî û wiha got: “Divê êriş tavilê bi dawî bibin. Divê aştî demildest bê. Em, qetilkirina rojnamegeran şermezar dikin.”
‘EM PIŞTGIRIYÊ DIDIN CIWANÊN KURD’
Parlamenterê DEM Partiyê yê Rihayê Omer Ocalan jî bertek nîşanî qetilkirina rojnamegeran da û ev tişt anî ziman: “Em, qetilkirina rojnamegeran şermezar dikin. Gelê kurd ji bo aştiyeke birûmet hewl dide. Em dijminatiya tu kesî nakin. Kurd dixwazin li Kurdistan û Rojhilata Navîn bi aştiyane bijîn. Li Kobanê li dijî DAIŞ’ê têkoşîneke mezin hate dayin. Dinyayê Kobanê bihîst. Kurd dixwazin mîna hemû gelên cîhanê wekhev bijîn. Kesek polîtîkayên Tirkiyeyê yên li dijî Rojava qebûl nake. Li Rojava li dijî xwişk-birayên me şerek heye. Statû, mafê Kurdan e. Em piştgiriyê didin hêzên Kurdan. Divê her çar parçeyên Kurdistanê berê xwe bidin Rojava. Divê Kurd weke şandeyekê biçin Şamê. Kurd, destê aştiyê li jor nahêlin. Em ji bo aştiyê amade ne. Em siyaseta demokratîk dimeşînin. Em ê mafên xwişk-birayên xwe yên li Rojava biparêzin. Me koletî qebûl nekir û dê qebûl nekin. Fikr û nêrîn çiqas cuda jî bin divê her kes bi hev re hewl bide.”
JI BO NAZIM DAŞTAN Û CÎHAN BÎLGÎN DAXUYANÎ
Têkildarî qetilkirina Nazim Daştan û Cîhan Bîlgîn jî li ser navê Komeleya Rojnamegeran a Dîcle Firatê (DFG) û Komeleya Rojnamegerên Jin a Mezopotamyayê (MKG) rojnameger Ceylan Şahînlî axivî û wiha got: “Hevalên me ji ber heqîqetê hedef hatin girtin û hatin qertilkirin. Parastina Nazim û Cîhanê ji bo me mijara rûmetê ye. Em ê heta dawiyê xwedî li têkoşîna wan derkevin.”
‘EM ŞOPDARÊN ŞEHÎDÊN ÇAPEMNIYÊ NE’
Nûnerê DÎSK Basin-Îşê Hakki Boltan jî anî ziman ku hemû cîhanê bi saya nûçeyên Nazim Daştan û Cîhan Bîlgînê hay ji rastiya li Rojava bûn û ev tişt anî ziman: “Heta ku Çapemeniya Azad hebe dê rastî di tariyê de nemîne. Em, şopdarên şehîdên Çapemeniya Azad in.”
Daxuyanî bi dirûşmên “Şehîd namirin” û “Nazim û Cîhan rûmeta me ne” bi dawî bû.