Danişîna duyemîn a doza Narîn Guran a 8 salî ku di 21’ê Tebaxê de li gundê Çûlî yê navçeya Rezanê ya Amedê winda bûbû û cenazeyê wê di 8’ê Îlonê de hatibû dîtin, di roja duyemîn de li 8’emîn Dadgeha Cezayên Giran a Amedê didome. Ji bersûcan dayika Narîn Guranê Yuksel Guran, kekê wê Enes Guran, apê wê Salîm Guran û cîranê wan Nevzat Bahtiyar tev li danişînê hatin kirin. Li gel parêzerên aliyan, Baroya Amedê, gelek rêxistinên jin û zarokan û siyasetmedar jî di danişînê de amade ne. 

 

Roja duyemîn a danişînê bi parastina Salîm Guran dest pê kir. 

 

NEVZAT BAHTIYAR SÛCDAR KIR

 

Salîm Guran, tiştên di roja bûyerê de kiribû vegot. Guran, îdia kir ku di saeta Narîn winda bûyî de keça wî li wî geriyaye, agahiya windabûna Narînê daye û tevî Mehmet Selîm Atasoy tavilê çûye gund. Guran, tiştên berê gotibû dîsa dubare kir. 

 

Parêzeran, bal kişandin ser îfadeyên binakok ên Guran. Guran, îdia kir ku îfadeyên wî rast in. Guran, bal kişand ser Nevzat Bahtiyar û got: “Vî kesî hem em hem jî malbata me tune kir.” 

 

Guran, tawanbarî qebûl nekir û wiha got: “Canê me çû, ez hêj neçûme ser gora wê. Ji kerema xwe li ser malbata me şovê nekin. Em tune bûn, em êdî nikarin xwe vebêjin. Ez ji ber mirina biraziya xwe têm darizandin. Malbata me tevek perîşe ye, çima ewqas xerabî, çima ewqas niyetek xerab. Ji ber DNA’yekê çi bi serê min hat.” Guran, daxwaza beraetê kir. 

 

'CENDIRME KETE PEY ÇÎROKÊN CUDA’

 

Parêzerê Salîm Guran, Onur Akdag jî bersûc Nevzat Bahtiyar sûcdar kir. Akdag, diyar kir ku Bahtiyar li gorî her delîl û rewşên nû îfadeya xwe diguherîne û ev tişt anî ziman: “Kesek li ku derê winda bibe, ji ewil li cihê herî nêz lêgerîn tê kirin. Li vir mala Nevzat li cihê herî nêz e. Heke Nevzat di kêliya ewil de bihata tespîtkirin, heke beriya Salîm bihata dîtin, dê nekariya çi tiştan di serê xwe de çêbike. Nevzat, du hefte û nîv piştre hate binçavkirin. Ku ew jî bi xwe nebûye îtîrafkar. Dema kameraya çewlikê dihat lêkolînkirin, dîtin ku wesayîta sor diçe ser rûbarî û Nevzat wisa ferq kirine.” 

 

Akdag, bal kişand ser îfadeyên binakok ên Bahtiyar û wiha got: “Ev cînayete kengî hatiye kirin, di vê mijarê de agahiyên demeke nêz di destê me de hene. Jixwe li ser wê rêyê hate kuştin. Wesayîta keçik di hundirê wê de bû jî saet di 15.40’ê de li ser rûbarî bû. Ez deqîqeya kuştina Narînê bibêjim? Saet di 15.13’ê de di nav destê Nevzat de canê xwe ji dest dide. Em qala demekê herî zêde 19 deqeyan dikin. Kî dikare îzaheta wê bo min bike ku ev cînayet ji hêla gelek faîlan ve hatiye kirin? Lewma divê hejmara faîlan bi qasî ji dest tê kêm be. Zarok, 19 rojan nehate dîtin, li cihê diviyabû lê bihata nihêrtin nehat nihêrtin, tiştên diviyabû bihatina kirin nehatin kirin, Nevzat nehat tespîtkirin. Dema faîl nedîtin jî li pey afirandina faîlan ketin. Heke cendirmeyan ji ewil kesekê bi navê Ahmet bigirtina, Nevzat dê navê wî bidaya. Em mizgîniya, nûçeya fermandarê cendirmeyan jî ji bîr nekin. Wê demê Narîn di rûbarî de bû. Dema hêzên ewlekariyê nekarîn bûyerê zelal bikin, bi hêrsokî tevgeriyan. Cendirme di her îfadeyê de ketin pey çîrokeke cuda. Kê çi gotibe, saet û faîl li gorî wê guherîn. Wisa bû ku êdî kar nehat çareserkirin. Di dawiya rojê de Nevzat hate girtin û çîroka wî xistin destpêka lêpirsînê. Nevzat çi gotibe lêpirsîn li gorî wê hate meşandin. Lê tekane kesê sûcê wî teqezbûyî Nevzat e. Kî heye kî tune ye bi destê her kesî girtin û xistin hundir.” 

 

HESABA GAVAN KIR 

 

Akdag, diyar kir ku hêj ne diyar e bê Narîn ji hêla kê ve hatiye kuştin û wiha domand: “Nevzat di her îfadeya xwe de qala betaniyeyê dike. Çima? Di her îfadeyê de qala çîrokeke nû dike lê tenê tiştek qet naguhere ku dibêje Salîm zarok kuştiye. Li ser medyaya civakî bûyerê dişopîne û hewl dide îfaeyên xwe sererast bike.” Akdag, got ku Salîm Guran di roja bûyerê de 2 fatûre dane û xwest ku ji bankan re muzekkere were nivîsandin bê ka ev fatûreye bi awayekî ototamîk hatine dayin an na. 

 

Akdag, destnîşan kir ku wî îspat kiriye ku Salîm Guran ê di 18’ê Kanûnê de hatiye girtin tenê 45 gav avêtiye û wiha pê de çû: “Heke ne 45 lê 145 gav biavêtiya, gelo ma her kesî Salîm weke kujer ne radigihand? Li gorî rapora bazê, Salîm divê herî kêm 400 gavan biavêje. Saet 15.20’ê em ber deriyê mala Arîf esas bigirin. Salîm, di navbera 15.00 û 15.20’ê de diçe govê û tê. Salîm, saet di 15.30’ê de dîsa diçe govê. Bila 70 gav bin, hatin û çûn bila 150 gav bin. Dîsa diçe govê û 60 gavên din, di rê de 80 gavên din û piştre 20 gavên din. Daneyên bazê Salîm li malê nîşan didin. 10 gav jî ji wir. Kesek nabêje ‘Salîm kuştiye’ lê dibêjin Enes kuştiye û Salîm jî temaşe kiriye. Heke em Salîm ji nav derxînin, senaryo têk diçe. Di vê sepanê de hûn dikarin tenê çendek daneyên diyar jê bibin, ne pêkan e saetan jê bibin.” 

 

Akdag, bal kişand ser rapora krîmînal û wiha got: “Tam fiyasko ye. Krîmînal a neteweyî dibêje Narîn derketiye hevraziyî. Ên ku Narînê tespît dikin çim Nevzat an jî Salîm tespît nakin? Li gorî raporê, Narîn di nava 50 saniyeyan de li hevrazî derdikeve. Kesên sere jî dikarin di 2 deqeyan de wî hevraziyî derkevin. Lewma jî tu bingeha tespîtên di vê mijarê de nîne.” 

 

Akdag, qeydeke telefonê ya ku Salîm Guran dibêje “Keça birayê min e, 8 salî ye. Herî dawî saet di navbera 15.00-15.30’ê de hatiye dîtin. Wê demê wesayîta mirtiban dîtine. Wesayîteke sor a kevin dîtine, guman ji wê birine.” da guhdarîkirin. Akdag, wiha domand: “Di vê navberê de li Çarikliyê di hinek malan de lêgerîn hate kirin û îdia kirin ku malên Salîm in lê tu eleqeya van malan bi Salîm re nîne. Salîm çi bihîstibe, di vê qeyda deng de wê dibêje.” 

 

Akdag, got ku ew bawer nakin ku kesên pispor bêalî bin û xwest ji zanîngehê rapora kesên pispor were girtin. Akdag, dîsa îdia kir ku kujerê Narîn Guranê Nevzat Bahtiyar e, xwest miwekîlê wî bê tehliyekirin û beraetkirin û xwest “cezayê hefsa malê” were dayin. 

 

Danişînê heta saet 14.00’ê navber da danişînê. Danişîn, dê piştî navberê bi parastinên bersûc û parêzerên wan bidome.