Çalakiya nobetê ya li dijî êrişên dewleta tirk û koma wê ya paramîlîter SMO’yê yên li ser Bakur û Rojhilatê Sûriyeyê li ser sînorên Kobanê û Qamişloyê hatine destpêkirin, didomin. Xelkê Kobanê jî li ser sînor ev çalakî silav kirin. Li gel siyasetmedaran gelek kes tev li çalakiya li ser sînorê Kobanê û Pirsûs a Rihayê bûn. Di çalakiyê de pankarta “Rojava û Bakur yek gele û yek doz e. Berxwedana gelê me yê Bakurê Kurdistanê silav dikin” hate hilgirtin û daxuyanî hate dayin. Di daxuyaniyê de alayên Rêveberiya Xweser a Demokratîk a Bakur û Rojhilatê Sûriyeyê û Hêzên Sûriyeya Demokratîk (HSD) hatin hilgirtin. 

 

‘KOBANÊ BÛ YEKITIYA KURDAN Û MIROVAHIYÊ’

 

Daxuyanî ji aliyê Hevserokê Rêveber a Kantona Firatê Ferhan Hec Îsa ve hat xwendin.

 

Ferhan Hec Îsa diyar kir ku Kobanê careke din pêşeroja wan diyar dike û wiha got: “Kobanê bi berxwedana xwe li tevahî dinyayê daye naskirin û bi yekitiya tevahî Kurdistanê Kobanê bû berxwedêr. Kobanê bû yêkitiya hemû mirovahiyê. Ew yekitî bi xwe re tevahî hêzên terorê tune kir. Hemû xebat û serketina Kobanê deng da cîhanê. Li Goristana Şehîd Dîcle bi sedan nasnameyên cuda yên Kurdistanî hene. Di nav muzexaneya malbatên şehîdan de dîmenê hevalên ji Dîlok, Amed, Pirsûs, Semsûr, Mahabad, Hewlêr, Silêmaniye û hemû bajarên Kurdistanê hene. Van hevalan di şexsê berxwedana Kobanê de yekitî ava kirin. Di şexsê van lehengan de yekbûna gelê Kurdistanê pêk hat.”

 

‘KURDISTAN YEK DENG E’

 

Bi domdarî Hec Îsa bal kişand ser têgehên “Kurdên Sûriyeyê û Kurdistana Tirkiyeyê” û ev tişt anî ziman: “Lê bila bizanibin ku Kurdistan yek reng û yek deng e. Ew jî bi berxwedana gelê Kobanê û berxwedana serxet û binxetê re çêbû. Ew berxwedana ku di sala 2014'an de pêk hat, bi piştgiriya hemû gelê Kurdistanê re çêbû. Bi taybetî jî gelê Bakur ji Pirsûsê heta Semsûr û Amedê her kes seferber bû û cihê xwe di nav berxwedanê de girt. Ji Kobanê rimrima azadiyê dihat.”

 

SPASIYA GELÊ BAKUR KIRIN

 

Di berdewamê de Hec Îsa li ser navê gelê Kobanê spasiya gelê Bakur kir û wiha pê de çû: “Em tenê spasiyê nakin, em wan ji dil û can hembêz dikin. Berxwedana wan ji dil û can silav dikin.  Bi hebûna hêza me û di şexsê sekna wan de berxwedan car din geş dibe. Mezinbûna Kobanê ji ber sekna wan e û bi sekna 1`ê Mijdarê re pêk hat. Dewletên ku Kurd nas nedikirin, îro Kurdan nas dikin. Gelê me yê Bakur û DEM Partî heta dawî li ber xwe dan, Ew bûn roj û li asîmanên hilhatin û şewqa xwe dan Kurdistanê. Bi helwesta gelê Bakur îro serkeftin misoger e. Em ji pêvajoyekê pir hesas derbas dibin. Divê em bi hev re vê qeyranê derbas bikin û bi hev re têbikoşin.

 

EM Ê DÎSA SERBIKEVIN

 

Çawa ku me di 26’ê Çileya 2015'an de serkeftin misoger kir, em dikarin carekê din bi deng dayîna Kobanê û hemû Kurdistanê serbikevin. Em gelê xwe yê Bakur silav dikin. Ew sekna ku bi banga seferberiyê re ref bi ref derbasî Kobanê bû, serkeftin misoger kiribû û em ê cardin bi wê seknê serbikevin. Roja serkeftinê ye, ji ber vê em ê serkeftinê misoger bikin."

 

Daxuyanî bi dirûşmên “Bijî Berxwedana gelê Kurd” û “Bijî berxwedana Rojava” bi dawî bû.