Bi boneya 26'emîn salvegera Komploya Navneteweyî ya 15'ê Sibatê ya li dijî Rêberê PKK'ê Abdullah Ocalan, li bajarê Strasboûrg ê Fransayê bi beşdariya bi hezaran kesî meş û mitîngek hat lidarxistin. Kurdistanî û dostên wan ên ku ji çar aliyê Ewropayê ji bo çalakiya ku bi mehan amadekariya wê hat kirin hatin cem hev, daxwaza azadiya fizîkî ya Abdullah Ocalan û çareseriya demokratîk a pirsgirêka Kurd kirin.

 

Hevseroka Kongreya Civaka Demokratîk a Kurdistaniyên Ewropayê (KCDK-E) Zubeyde Zumrut, peyama ku di mitîngê de hat aşkerakirin û plansaziyên ji niha û pê ve bên kirin nirxand.

 

Zubeyde Zumrutê destnîşan kir ku piştî komploya 15'ê Sibata 1999'an gelê Kurd di nava berxwedaneke bênavber de ye û got ku ev berxwedan û daxwaza azadiyê di sala 26'an a komployê de gihiştiye lûtkeyê. Zûbeyde Zumrutê got: “Her sal li çar aliyê cîhanê Kurd ji bo şermezarkirina Komploya 15’ê Sibatê dadikevin qadan û azadiya Rêber Apo dixwazin. Lê îsal bi taybetî bi kampanyaya 'Ji Abdullah Ocalan re azadî, ji pirsgirêka Kurd re çareseriya demokratîk' ku di 10'ê Cotmeha 2023'yan de dest pê kir, hevalên me jî tev li xebatên azadiya Rêbertî bûn. Ji ber ku dizanin ku ji ber krîza pergala kapîtalîst, ji ber şer Rojhilata Navîn xitimî ye û paradîgmaya Rêber Apo ji bo hemû cîhanê rizgarî ye."

 

Zubeyde Zumrutê diyar kir ku gelek komên cuda beşdarî mitînga 15’ê Sibatê bûne û got: “Di vê sedsalê de komplo hat pûçkirin. Berxwedana gelê Kurd ne tenê komployê pûç kir, di heman demê de hişt ku têkoşîn ewqasî gerdûnî bibe. Berxwedana Îmraliyê ya Rêber Apo û têkoşîn û berxwedana gel bûye xeta azadiyê. Di mîtîngê de derket holê ku gel çawa li dora Rêbertî bûye yek, paradîgmaya Rêber Apo gelan kiriye yek û ev têkoşîn çawa mezin bûye."

 

DAXWAZA JI BO AZADIYA FIZÎKÎ YA ABDULLAH OCALAN

 

Zubeyde Zumrutê got: “Bi hevdîtinên 15’ê Sibata îsal ên bi birêz Abdullah Ocalan re, nêzîkatî û hêviyek çêbû ku piştî 26 salan roj careke din ronî bibe û veguhere azadiyê. Lê li hemberî Rêber Apo ku demeke dirêj li Girava Îmraliyê di nava şert û mercên giran ên tecrîdê de tê girtin û tevî mafê hêviyê jî ev yek pêk nehat, hêrseke mezin hebû. Tişta din a ku di mitîngê de derket holê jî ev bû ku me dît kampanyaya 'Ji Rêber Apo re Azadî û ji Kurdistanê re statu' bandorek li tevahiya cîhanê kiriye. Yên ku beşdarî xebatên me bûn, ji bo azadiya fizîkî ya birêz Ocalan xwedî daxwazên cidî ne."

 

‘DIVÊ EM DESTÊ RÊBERÊ XWE XURT BIKIN'

 

Zubeyde Zumrutê diyar kir ku têkoşîn û berxwedana bi kampanyaya "Ji Abdullah Ocalan re azadî, ji pirsgirêka Kurd re çareseriya demokratîk" deriyên Îmraliyê vekiriye û got: "Hevdîtin hêvîdar in. Bi rastî ev hêvî û coş di mitîngê de derket holê. Ji çar aliyên cîhanê gel bi zimanên cuda dirûşma 'Bê Serok jiyan nabe' berz kirin. Ev peyam di pankartên ku hilgirtin û axaftinên li mitîngê de derketin pêş. Têkoşîna me hem di warê dîplomasî, hem jî di warê hiqûqî û civakî de gihîşt astekê. Lê ev hê jî berdewam dike. Me derî vekir û dengê Rêber Apo bihîst. Ji bo çareseriya pirsgirêka Kurd amadekariyên Rêber Apo yên cidî hene. Ev di nava gel de heyecaneke cidî çêdike û nîşan dide ku divê em hîn bêtir xwedî li têkoşînê derkevin û destê Rêberê xwe xurt bikin."

 

Zubeyde Zumrutê diyar kir ku gel dixwaze daxilî pêvajoyê bibe û wiha got: “Di pêvajoya çareseriyê ya berê de hem di nava me de hem jî di nava civakê de dilrehetiyeke cidî hebû. Nêzîkatiyeke ku hemû bar li ser milê Rêber Apo be hebû. Lê di xebatên ku me di vê serdemê de li qadan meşandin, di hevdîtinên xwe yên yek bi yek de û di civînên gel ên bi munasebeta 15’ê Sibatê de me dît ku xwestek, hişmendî û hêviyek xurt heye ku her kes bi xwe tev li pêvajoyê bibe."

 

MA / Esra Solîn Dal