Wezareta Karên Hundir duh Şaredarê Bajarê Mezin ê Stenbolê Ekrem Îmamoglû û Şaredarê Navçeya Beylîkduzuyê Mehmet Mûrat Çalik ji peywirê dûr xist. Di heman demê de li Şaredariya Şîşliyê qeyûm tayînnkir. Bi biryara dawî re hejmara şaredariyên ji hilbijartinên rêveberiyên herêmî yên 31’ê Adara 2024’an heta niha qeyûm lê hatine tayînkirin derket 13’an. 

 

Wezaretê di 3’yê Hezîranê de li Şaredariya Colemêrgê qeyûm tayîn kir. Bi biryara qeyûm re Hevşaredar Mehmet Siddik Akiş hate girtin û di 5’ê Hezîranê de 19 sal û 6 meh cezayê girtîgehê lê hate birîn. 

 

Şaredarê Esenyurta Stenbolê yê CHP’î Ahmet Ozer ku bi modela “Lihevkirina Bajar” hatibû hilbijartin, di 30’ê Cotmeha 2024’an de bi îdiaya “endamtiya rêxistinê” hate binçavkirin û hate girtin. Di 31’ê Cotmehê de jî Cîgirê Waliyê Stenbolê Can Aksoy weke qeyûm li şûna Ozer hate tayînkirin. 

 

Di 4’ê Mijdarê de li Şaredariya Bajarê Mezin a Mêrdînê û şaredariyên Êlih û Xelfetî ya Rihayê qeyûm hatin tayînkirin. 

 

Di 22’yê Mijdarê de li Şaredariya Dêrsimê ya DEM Partiyî û Şaredariya Pulurê ya CHP’î qeyûm hatin tayînkirin. Di 20’ê Mijdarê de li Hevşaredarê Dêrsimê Cevdet Konak û Şaredarê Pulurê Mûstafa Sarigul 6 sal û 3 meh cezayê hefsê hate birîn û ev weke hinceta qeyûm hate nîşandan. 

 

Hevşaredarê Miksê ya Wanê Ayvaz Hazir di 29’ê Mijdarê de ji peywirê hate girtin û li şûna wî qeyûm hate tayînkirin. Bi hinceta ku Hazir di sala 2015’an de dema li beşa çapemeniyê dixebitî daxuyaniyek şopandiye 3 sal û 11 meh cezayê hefsê lê hatiye birîn û der heqê wî de bi îdiaya “propagandaya rêxistinê” lêpirsîn hatiye vekirin, li şûna wî qeyûm hate tayînkirin. 

 

LI ŞAREDARIYA AKDENÎZÊ QEYÛM HAT TAYÎNKIRIN 

 

Hevşaredarên Akdenîz a Mêrsînê Nûriye Arslan û Hoşyşar Sariyildiz di 10’ê Çileyê de hatin binçavkirin û piştre hatin girtin. Di 14’ê Çileyê de jî li şûna wan qeyûm hate tayînkirin. 

 

Di dema rojnamegeriyê de der heqê Hevşaredara Sêrtê Sofya Alagaş de bi îdiaya “endamtiya rêxistinê” doz hatibû vekirin û di 28’ê Çileyê de 6 sal û 3 meh cezayê hefsê lê hate birîn. Wezareta Karên Hundir di 29’3e Çileyê de qeyûm li şaredariyê tayîn kir. 

 

Danişîna doza Hevşaredarê Bajarê Mezin ê Wanê Abdullah Zeydan ku bi îdiaya “alîkarî daye rêxistinê” dihat darizandin, di 11’ê Sibatê de jinûve hate lidarxistin û 3 sal û 9 meh cezayê hefsê li Zeydan hate birîn. Di 15’ê Sibatê de jî li şaredariyê qeyûm hate tayînkirin. 

 

Di 24’ê Sibatê de li Şaredaria Qaxizman a Sêrtê qeyûm hate tayînkirin. Hevşaredar Mehmet Alkan di 20’ê Sibatê de bi îdiaya “endamtiya rêxistinê” haet darizandin û 6 sal û 3 meh cezayê hefsê lê hate birîn. Bi hinceta vê cezayê jî qeyûm hate tayînkirin. 

 

Wezaretê, duh jî li Şaredariya Şîşliyê ya CHP’î qeyûm tayîn kir. 

 

ŞAREDARÊN JI PEYWIRÊ HATINE DÛRXISTIN 

 

Li gel tayînkirina qeyûman, li hêla din heta niha gelek şaerdar û şaredar jî ji peywirê hatine dûrxistin û li şûna wan serokwekîl hatine tayînkirin. Şaredarê Beşîktaşê Riza Akpolat di 17’ê Çileyê de bi îdiayên “endamtiya rêxistina sûc”, “di îhaleyê de hîle kiriye” û “bi neheqî mal û milk bi dest xistiye” ji peywirê hate dûrxistin. 

 

Şaredarê Beykozê Alaattîn Kose ku hate girtin jî di 4’ê Adarê de ji peywirê hate dûrxistin. Her wiha duh jî Şaredarê Bajarê Mezin ê Stenbolê Ekrem Îmamoglû û Şaredarê Beylûkduzuyê Mûrat Çalik ji peywirê hatin dûrxistin. 

 

Ji bo şaredariyên Beşîktaş û Beykozê serokwekîlên nû hatin hilbijartin û sibe jî dê ji bo ÎBB û Beylîkduzuyê hilbijartina serokwekîlan bê kirin.