AMED - Baroya Amedê û OHD bi daxwaza betalkirina biryara "ÇED ne lazim e" ji bo lêgerîn û xebatên madenê yên li herêma Hesandîn a Pasûrê serî li dozgeriyê dan.
Şîrketa Anonîm a Maden û Bazirganiya Derve ya Kulpê ya Mehmet Emîn Eren, ji bo derxistina rezervên hesin û kromê yên li navçeya Pasûra Amedê, ji bo rapora "Nirxandina Bandora Derdorê" (ÇED) serî li Walîtiya Amedê û Midûriyeta Hawirdor, Bajarvanî û Guherîna Avhewayê ya Bajêr da. Wezaretê ku serlêdanê lêkolîn kir, di 11'ê Hezîrana 2008'an de biryar da ku ji bo keşfê "ÇED ne hewce ye". Gel li dijî xebatên lêgerînê yên li herêmê bertek nîşan dan. Cihê ku tê xwestin projeya navborî lê bê çêkirin pêdiviyên avê yên gundên Nêrçik, Şînas, Dimilyan, Hêlîn, Beyrok, Înîka û zêdetirî 100 gundikên girêdayî wan peyda dike.
Piştî bertek zêde bûn Baroya Amedê û Platforma Hesandînê, di çarçoveya "Qanûna Agahîwergirtinê" de agahî ji Midûriyeta Hawirdor, Bajarvanî û Guherîna Avhewayê ya Bajêr xwest. Midûriyetê di 6'ê Îlona 2024'an de bersiva da û got: "Ji ber ku biryara bi dirûka 11'ê Hezîrana 2008'an û hejmara 272 (ÇED ne hewce ye) di nava 5 salan de nehatiye pêkanîn, betal bûye." Piştî vê şîrketa madenê xebatên xwe dan sekinandin û bertek jî sekinîn.
Lê belê derket holê ku Midûriyeta Hawirdor, Bajarvanî û Guherîna Avhewayê ya Bajêr a Amedê ku agahiya "ÇED ne hewce ye" dabû Baroya Amedê, ji şîrketê re jî gotiye dema derbasbûyînê ya biryara "ÇED ne hewece ye" didome. Midûriyetê daxwazên di 9'ê Cotmeha 2024'an de bersivandiye û gotiye ger proje di nava 5 salan de neyê destpêkirin wê bê betalkirin.
Piştî demekê, 19 roj şûnde li herêmê xebatên çêkirina rê dest pê kirin. Şêniyên herêmê jî ji bo bertek nîşan bidin çûn herêmê û ji wan re hatiye gotin ku xebata tê kirin ne ji bo lêgerîna madenê ye, ji bo baregeha leşkerî tê çêkirin.
Piştî biryara Midûriyeta Hawirdor, Bajarvanî û Guherîna Avhewayê ya Bajêr a ji bo domandina derbasdariya "ÇED ne hewce ye" Komîsyona Hawirdor û Bajêr a Baroya Amedê Şaxa OHD a Amedê ji bo betalkirina biryaraê serî li Dadgeha Îdareyê dan.
Serokê Komîsyona Hawirdro û Bajêr a Baroya Amedê Ahmet Îna anî ziman ku bi daxwaza "rawestandina xebatê" û "betalkirina biryara "ÇED ne hewce ye" doz li Dadgeha Îdare ya 2'yan a Amedê vekirine û got ku dê giliyê kesên ku ev kirine jî bikin.
MA / Mujdat Can